Indartsu dator Errugbiaren Astea, bigarrenez
Errugbiaren bigarren astea antolatu du Orereta Rugby Taldeak Errenteria-Oreretan. Ekainaren 1etik 8ra egingo dute.
Errugbiaren lehen asteko irudi bat.Orereta Errugby Taldea Errugbiaren bigarren astea antolatu du Orereta Rugby Taldeak Errenteria-Oreretan. Ekainaren 1etik 8ra egingo dute, eta ate irekien entrenamenduarekin hasiko dute igandean bertan (ekainak 1). Beraungo estadioan izango da 11:00etatik 12:30era. Lekukoa, hitzaldi batek hartuko du, Euskaldunentzako kirol egokia: euskal errugbiaren istorioak, zehazki. Asteazkenean izango da hori, ekainak 4, 18:30ean Reina aretoan eta 1980 eta 1990 hamarkadetan errugbi taldea sortzeak suposatzen zuenaz ariko dira Euskalerriko Rugby Eskola Independientearen (EREI) ildotik sortu ziren Lasarte Oriako Beltzak taldeko eta emakumeen RC Irun taldeko jokalariak.
Hurrengo egunean, ostegunarekin, saio berezia egingo dute Beraunen Orereta Rugby Taldekoek udal gaztelekuetan ari diren gazteekin.
Larunbata, ekainaren 7a, izango da astearen barruko egunik oparoena eta egitarau zabala ondu dute egun osorako. Rugby Stret topaketarekin abiatuko dute eguna eta bertaratzen diren taldeek lau jokalaritako tokatak—plakajerik gabeko partidak— jokatuko dituzte. Agirre Lehendakariaren plazan izango da hori, 11:00etatik 14:00etara eta inprobisatutako joko zelaiaren ondoan arauen azalpenak jarriko dituzte ikusleek eskura izan ditzaten.
Partidak bukatuta aipamen berezia jasoko dute Orereta, Lezo, Beltzak eta beste taldeetako jokalari izandakoek. Arratsaldean, Kaputxinoetako Fuentepelayo plazan errugbi jokoak eskainiko ditu Orereta Rugby Taldeak gerturatzen diren gaztetxoei begira. Auzo horretako jaien barruan egingo dute saioa, 18:00etan hasita.
Ekainaren 8an jarriko diote asteari ginga 10 , 12 eta 14 urtez azpiko lagunarteko partidak jokatuko dituzte Mikel Odriozola estadioan, 11:00etatik aurrera.
Denboraldian egindako lanarekin “pozik” azaldu da Xabier Sanchez Agirregomezkorta Orereta Rugby taldeko lehendakaria, “hainbat erronka berri izan ditugu eta egoki erantzun diegu jiokalariek eta taldearen ingurukoek emandako bultzadari esker”. Errugbiaren astearekin bukaera biribila eman nahi diotela aurtengo denboraldiari gaineratu du Sanchezek.
Babesleei egin die aipamena azkenik presidenteak. Aurreko urtekoak mantentzeaz gain, babesle berriak ere gerturatu zaizkiela azken asteetan nabarmen jarri du, “horrek proiektua indartzeaz harago, luzera begiratzeko aukera ere ematen digu”.
Errugbi Astearen lehen aldian, errugby street.Orereta Rugby taldea
Errugbiaren astea
Ekainak 1, igandea
- 11:00-12:30 – Mikel Odriozola estadioa, entrenamendu irekia
- 12:30-14:00 – Pablo Sorozabal plaza, argazki erakusketa
Ekainak 4, asteazkena
- 17:00-20:00 – Reina aretoa, argazki erakusketa
- 18:30-20:00 – Reina aretoa, “Errugbia, euskaldunentzako kirol aproposa: euskal errugbiaren istorioak” hitzaldia
Ekainak 5, osteguna
- 18:30-20:00 – Mikel Odriozola estadioa, Gaztelekuekin errugbi saioa
Ekainak 6, ostirala
- 17:00-20:00 – Xabier Olaskoaga, argazki erakusketa
Ekainak 7, larunbata
- 11:00-14:00 – Lehendakari Agirre plaza, Rugby street topaketa
Segidan – Beteranoekin hirugarren denbora - 18:00-19:30 – Fuentepelayo plaza (Kaputxinoak), errugbi saioa auzoko jaietan
Ekainak 8, igandea
- 11:00-14:00 – Mikel Odriozola estadioa, S10-S12-S14 mailetako lagunartekoak
