Musikaz Blaik musikaz eta dantzaz beteko ditu Trintxerpeko kaleak
Gaurtik eta ekainaren 1era bitartean, Illunbek antolatzen duen Musikaz Blai jaialdiaren XVI. ekitaldia egingo da, zortzi ekitaldirekin. Serafin Esnaola plaza izango da jaialdiaren epizentroa.
Gaurtik (hilak 29) eta ekainaren 1era bitartean, Illunbe Musika Elkarteak antolatzen duen Musikaz Blai jaialdiaren XVI. ekitaldia jasoko du Trintxerpek. Egitasmo horrek hainbat helburu ditu: musika eta dantza herritarrengana hurbiltzea, adierazpen artistiko horiek ezohiko espazioetara eramanez; eta Trintxerpe dinamizatzea, kaleak agertoki bizi eta parte hartzaile bihurtuz. Serafin Esnaola plaza izango da musika eta dantza uztartzen dituen jaialdiaren epizentroa. Orotara, zortzi ekitaldirekin gorpuztu dute XVI. ekitaldia.
Lehen jarduera gaurko 19:00etan izango da, Serafin Esnaola plazan, eta Pasaiako Udal Musika eta Dantza Eskolako taldeak arituko dira: Euskal Dantza Taldea, Banda Txikia, Gaita Galegoko ikasleen taldea eta perkusio taldea. Ekitaldiek bihar (ostirala) izango dute jarraipena. Serafin Esnaolak Musika Modernoaren eta Konboen jaialdia jasoko du, 18:00etan. P.M.K. eta Octopus taldeak arituko dira.
Gainontzeko emanaldiak asteburuan izango dira. Larunbatean (hilak 31) lau ekitaldi jasoko ditu Trintxerpek. 12:00etan, trikitixa eta panderoko ikasleek kalejira egingo dute. 13:00etan, Illunbe Bandak kontzertua eskainiko du Serafin Esnaolan. 18:00etan, Gipuzkoako Dantza Solteko Haurren Lehiaketaren 69. ekitaldia egingo da plaza berean. 16 urtetik beherako zortzi bikote izango dira Trintxerpen, eta Arin Arina dantzatuko dute, Illunbeko Txistulari Bandaz lagunduta. Azken jarduera 20:00etan izango da, eta Illunbe Akordeoi Orkestrak kontzertua eskainiko du Serafin Esnaolan.
Musika eta dantza uztartzen dituen zikloa igandean (ekainak 1) itxiko da. 12:00etan, txistulariek kalejira egingo dute, Euskadi Etorbidetik abiatuta. Ondoren, 12:30ean, Musika Eskoletako Txistularien Alarde tradizionala egingo da, Serafin Esnaolan. Igandeko ekitaldian Pasaiako, Hernaniko, Donostiako, Astigarragako, Getxoko, Berako eta Urretxuko txistulariek hartuko dute parte. Horiekin batera izango dira Pasaiako Erraldoien konpartsa, Ibaiertz eta Illunbe abesbatzak, Illunbe Euskal Taldea eta Pasaiako Udalaren Musika eta Dantza Eskolako perkusio eta metal saila. Donibaneko batelerak ere protagonista izango dira.
Honakoa esan du Aitor Brion Kultura eta Ondare zinegotziak Musikaz Blai jaialdiaren inguruan: “Pasaiako Udal Gobernuak musika eta euskal dantza babesten ditu. Horrelako ekitaldiek harrotasunez betetzen gaituzte, gure bizitza kulturalean pisu handiena duten bi diziplina artistiko balioesten dituelako”. Gorka Miranda Pasaia Musikaleko zuzendaria udal ordezkariaren ildotik mintzatu da: “Musikaz Blai egitasmoak balio kultural ukaezina du. Bere goranzko ibilbideak gure inguruko erreferentzia ziklo gisa sendotu du”.
Juanje Neira Illunbe elkarteko presidenteak adierazi du “hunkigarria” dela ikustea nola hazi den Musikaz Blai: “Pasaian proiekzio handiena duen zikloetako bat da. Zikloko musika programazioaren, txistularien alardearen eta euskal dantza txapelketaren artean sortutako senidetasunak programa osoa aberasten lagundu du, eta Gipuzkoa osoko ziklo garrantzitsuenetakotzat finkatu da”.
XVI. Musikaz Blai
Hilak 29, osteguna
- 19:00: Musika Eskolako taldeak. Serafin Esnaola plazan.
Hilak 30, ostirala
- 18:00: Musika Modernoaren eta Konbien jaialdia. Serafin Esnaolan.
Hilak 31, larunbata
- 12:00: Trikitixa eta panderoko ikasleen kalejira.
- 13:00: Illunbe Bandaren kontzertua. Serafin Esnaolan.
- 18:00: Gipuzkoako Dantza Solteko Haurren Lehiaketaren 69. ekitaldia. Serafin Esnaolan.
- 20:00: Illunbe Akordeoi Orkestraren kontzertua. Serafin Esnaolan.
Ekainak 1, igandea
- 12:00: Txistularien kalejira. Euskadi Etorbidetik.
- 12:30: Musika Eskoletako Txiistularien Alarde tradizionala. Serafin Esnaolan.
