Gaztañoko jaien bigarren egunean krosa, emakumeen pala txapelketa eta kontzertua
Krosak hamabigarren ekitaldia izango du aurten eta emakumeen pala txapelketa lehen aldiz antolatu dute.
Arrixku taldea kontzertuan ariko denetako bat izango da.Tolosaldeko Ataria Tantaka ari da zabaltzen aurtengo jai egitaraua Gaztañoko jai batzordea. Ekainaren 13tik 15era egingo dituzte eta pirata uharte bilakatuko den auzoan, egitarau zabala ondu dute hiru egunerako. Joan den astean zabaldu zuten lehenengo egunerako antolatutakoak, eta aste honetan bertan, larunbatekoen (ekainak14) berri eman dute.
Goiz partean, kirola erruz. Klasiko bat bilakatu den Gaztañoko krosaren hamabigarrena egingo dute. Ez da erraza ibilbidea, kontuan hartuta maldan gora eta behera egin behar dutela ibilbide osoan parte hartzaileek. Hala ere urtero parte hartzaile ugari ditu lasterketak, eta aurten ere, bide beretik egingo duen eta parte hartze zabala izango duen zalantzarik ez dute antolatzaileek. Ondoren etorriko da haur krosa. Izena emateko baliatu esteka hau.
Lasterketa bukatuta, bizikleta ginkana egingo dute. Horretan parte hartzeko beharrezkoa da norberak eramatea bizikleta eta kaskoa ere.
Erabilera anitzeko uhartean egin dute kirolarekin hurrengo hitzordua, arratsaldez izango da, 16:00etan hasita, Emakumeen Pala Txapelketaren lehen ekitaldia. Larunbatean sobera fama duen auzo mozorro afariaren txanda helduko da. Afaltzera bai, baina pirata jantziak ahaztu gabe bertaratzeko deia egin dute jai batzordeko kideek.
Ondoren kontzertua izango da Zabala Enea II Gaztetxean, 23:00etan hasita. Aingura, Arrixku eta Banana Shake taldeak ariko dira. Ondoren, eta auzoko karpan, DJ Bull.
Auzoko jaietako kamisetak erosteko deia ere egin dute jai batzordeko kideek. 10 euroan izango da salgai bihar 11:00etatik 13:00etara, eta ekainaren 1etik 5era egunero 19:00etatik 21:00etara auzo lokalean.
Bideoa zabaldu du jai batzordeak bigarren eguneko egitarauaren harira (klik hemen).
Gaztañoko jai egitaraua, larunbata (ekainak 14)
- 10:00: Gaztañoko XII kros herrikoia
- Ondoren, Haur Krosa eta hura bukatuta, bizikleta ginkana.
- 16:00: Mus txapelketa Bukagaitzen.
- 16:00: Emakumeen Pala Txapleketa Erabilera anitzeko gunean.
- 17:00: Altxorraren bila pirata txikientzat, Zabala Enea gaztetxetik abiatuta.
- Ondoren, Bixkor txaranga.
- 21:00: Mozorro afari herrikoia. Pirataz mozorrotuta joatea eskatu dute.
- 23:00: Kontzertua Zabala Enea II Gaztetxean: Aingura, arrixkua, Banana Shake
- 01:00: DJ Bull auzoko karpan.
