'Munstro bat ni ikustera etorri da' erakusketa, Xenpelar Etxean
Manuel Reboredo Castiñeiras zenaren lanekin osatutako erakusketa irailaren 22tik urriaren 4ra arte izango da ikusgai Xenpelar Etxean.
Hernanin egindako erakusketaren kartela. Harria, burdina, egurra, letoia, hormigoia, kobrea, zeramika, zezen adarra, erretxina, tinta, larrua… bidaietan aurkitutako elementuez urte luzez ondutako eskulturak bildu eta Munstro bat ni ikustera etorri da erakusketa osatu zuen Manuel Reboredo Castiñeiras zenak. Lehen aldiz erakutsi zituen lan horietako batzuk joan den apirilean Hernaniko Biteri aretoan egindako erakusketan.
Joan den maiatzean hil zen Reboredo.
Bere erakusketa hori Errenteria-Oreretara heldu da orain, haren lagunen iniziatibaz. 86 eskultura sortu zituen 1957an Marzonen (Coruña, Galizian) jaio eta bi urterekin Errenteria-Oreretara bizitzera etorri zen irakasle eta eskulturagileak. Errenteriaren ondotik, Pasai Antxo izan zuen bizileku, eta azken 20 urteak berriz, Oiartzunen eman zituen. Bere lan horien guztien lagin zabala bat hartuko du orain Xenpelar Etxeak, haren lagun Jose Luis Etxeberriak azaldu duenez, “50 bat lan izango dira Xenpelar Etxean jarriko dugun erakusketan. Ez dira eskultura handiak, eta askotariko materialekin eginak daude”.
Don Boscon lanbide heziketa institutuko delineazio eta egitura metalikoen irakasle izan zen Reboredo.
Lanak egiten urteak eman bazituen ere, joan den apirilera arte ez zuela erakusketarik antolatu azaldu du Etxeberriak, “lan ederrak ditu benetan, mordo bat, baina inoiz ez ditu erakutsi izan. Hernaniko erakusketarekin izugarri hunkitu zen, lanak erakusten zituen lehen aldia izan zelako. Gaixorik zegoen eta hala ere, erakusketara bertaratu zen. Erakusketa bukatzearekin batera hil zen, pasa den maiatzean”.
Haren lagunek, Reboredok utzitako artelanen legatua erakusten jarraitu nahi dute Xenpelar Etxeak irailaren 22tik urriaren 4ra arte hartuko duen erakusketaren bidez. Astelehenetik larunbatera bisitatu ahalko da 17:00etatik 20:00etara.
Kronikak elkarrizketa egin zion Reboredori Hernanik antolatutako erakusketaren harira. Hemen klik eginda irakur daiteke.
