Kilometro Lezoko emanaldietan aldaketak asteburuan
Euria iragarria dagoenez eta ikuskizunak behar bezala egin ahal izateko aldaketak egin ditu udalak ostiraleko eta igandeko emanaldietan.
Orratx Antzerki taldeak 'Bidaia galduak', azken antzezlana eskainiko du. Kilometro Lezo programaren barruko emanaldietan aldaketak iragarri ditu Lezoko Udalak. Euria dago iragarrita astebururako eta hori horrela, emanaldiak baldintza egokietan egin ahal izateko moldaketak egin ditu. Ostiraleko eta igandeko emanaldietan izango dute eragina aldaketa horiek, zehazki.
Egitarauak hiru emanaldi aurreikusten zituen astebururako, eta horren ordez, bi izango dira, biak Lezo Herri Eskolaren jolastoki estalian. Hirugarrena, bertan behera gelditu dela oraingoz, jakinarazi du udalak.
Ostiralean programatuta dagoen Atx teatroaren Marmarra ikuskizuna ordu berean mantenduko dute, 20:00etan, baina Lopene plazan egin beharrean, Lezo Herri Eskolako jolastoki estalira lekualdatu dute.
Larunbateko emanaldian ez da aldaketarik izango. Etxeko Orratx! Antzerki Taldearen Bidaia galduak antzezlana Lezo Herri Eskolako jolastokian gozatzeko aukera izango da, 22:00etan hasita.
Igandean, berriz, ez da Komorebi Produkzioak taldearen Argilunak dantza ikuskizuna ikusteko aukerarik izango. Oraingoz bertan behera utzi dute emanaldia, baina data berria ahalik eta azkarren jakinaraziko dutela jakinarazi dute Lezoko Udalak eta taldeak.
