Etorri berriak, euskararen gerizpera
'Ongi etorri euskarara' iniziatiba abiatu dute Oarsoaldeko lau udalek eta Euskara Batzordeak, etorri berriei begira.
Gerturatu euskarara kanpaina abiatuko dute astelehenean Euskara Batzordeak bultzatuta. Beste herrialde batzuetatik etorri berriak direnak sentsibilizatu eta euskarara hurbiltzera animatu asmoz Ongi etorri euskarara! Gerturatu Euskarara iniziatiba abiatuko du astelehenean —irailak 1— Oarsoaldeko Euskara Batzordeak eskualdeko lau udalekin elkarlanean. Kanpainaren bidez, gainera, Oarsoaldea eskualdeko bizitza sozial, kultural eta ekonomikoan integratzen lagundu nahi dituzte, halaber.
Kanpaina irailaren 1etik 30era izango da martxan eta arduradunek azaldu dutenaren arabera, helburu nagusia “euskara gizarte sustapenerako eta harrerarako tresna gisa erakustea da”. Hainbat euskarriren bidez “herritar berriei” euskarara gerturatzeko gonbita luzatuko diete, “autobus markesinetan, sare sozialetan, liburuxkak, bideoak eta tokiko komunikabideen bidez, beren interesetara egokitzen den urratsa egitera animatuz”.
Proposamena “malgua” eta “pertsonala” dela adierazi dute, “pertsona bakoitzaren motibazio eta erritmora” egokitua, alegia. Hori horrela, parte hartze maila ezberdinak proposatu dituzte kanpainaren barruan: oinarrizko hitzak eta agurrak ikastea; seme-alabak euskarazko hezkuntza ereduetan matrikulatzea; dendetan edo lan guneetan euskara sartzea; euskarazko jardueretan parte hartzea; edota elkarrizketa errazak hastea.
Kanpainak “euskara integrazio prozesuan lagun izan dadin ateak ireki eta eskua luzatu” nahi duela nabarmen jarri dute.
Halaber, bizikidetzarako eta aniztasunarekiko konpromisoa berretsi dute kanpainaren sustatzaileek: “Oarsoaldea eskualde anitza eta solidarioa da, elkarbizitzaren eta elkar aberastearen aldeko apustua egiten duena”. Bide horretatik, astelehenean abiatuko duten iniziatibak konpromiso hori indartzen duela jarri dute nabarmen, “euskara, bizitzeko lur hau aukeratzen dutenenganako ongietorri eta hurbiltasunerako beste elementu bat bezala jarriz”.
Oarsoaldeko Euskara Batzordeak “errespetutik eta aniztasunetik komunitatea eraikitzearen garrantzia” nabarmendu du, “euskara topagune bihurtuta”.
Kanpainako euskarriak euskaraz, gaztelaniaz, frantsesez, ingelesez eta arabieraz egin dituzte, eta etorri berrien zein Oarsoaldeko lau herrietako hainbat bizilagunen lekukotzak azaltzen dituen bideo laburrek osatzen dute kanpainaren euskarri nagusia. Azken horiek ikusteko klik hemen. Informazio gehiago, berriz, hemen klikatuta jaso dezakete interesdunek.
