Topoaren integrazioarekin "kezkatuta", bilera eskatu diote ETSri bost auzo elkartek
Topoa hiri ingurunean integratzea "estrategikotzat" jo dute auzo elkarteek udalerriaren etorkizunerako, eta etorkizun hori inguruko auzotarrak "kontuan hartuta" pentsatu eta eraikitakoa izatea galdegin dute.
Auzo elkarteetako ordezkariak. Topoaren etorkizuna eta zehatzago, hark Errenteria-Oreretan duen ibilbidearen gaineko hainbat informazio zabaldu dituzte azken hilabeteetan. Hori horrela, informazio horiek “zalantzak” eta “kezkak” sortu dizkietela bizilagunei adierazi dute Errenteria-Oreretako bost auzo elkartek HITZAra bidalitako prentsa ohar bidez. Zehazki, Galtzaraborda, Alaberga, Erdialdea, Gaztaño, Fanderia eta Agustinetako auzo elkarteak dira gaiaren bueltan informazio zuzen eta zehatz eske bildu direnak.
Egoera aztertzeko elkartu dira bost auzo elkarteetako ordezkariak, eta ondorio bateratura iritsi: “Lehen eskuko informazioa eskatu nahi diogu ETS Eusko Trenbide Sareari, topoaren arduradun eta kudeatzaile denari”.
Udalak egin duen Bideberria proposamena jaso dutela jarri dute nabarmen, “eta hura hobetzeko ekarpenak egin ahal izan ditugu antolatu dituen saio parte hartzaileetan”.
Topoa hiri ingurunean integratzea “estrategikotzat” jo dute auzo elkarteek udalerriaren etorkizunerako, “gaur egun arrakala, eta afekzioak direnak, etorkizunean kalitatezko espazio publikoa izatea nahi dugu”. Espazio horiek, gainera, inguruko auzotarrak “kontuan hartuta” pentsatu eta eraikitakoak izatea galdegin dute, “inguruko beste udalerri batzuetan egiten ari diren bezala”.
Azkenik, informazio eskaera zehatza egin diote ETSri, “mahai gainean dauden proposamenetan hobekuntzak proposatzeko”. Eusko Trenbide Sarea lantzen ari den proposamen eta irtenbide zehatzak Galtzaraborda-Alabergako ibarrerako, topoa erdialdetik igarotzen den eremurako, Gaztaño eta Erdialdeko geltokiaren ingururako, eta Fanderia eta Agustinak auzoen ingururako, batetik. Bestetik, ETSk esparru bakoitzerako planifikatuta dituen lan eta esku hartzeen egutegia.
“Erantzuna lehenbailehen jasotzea espero dugu. Uste dugu eskaera hau sinatzen dugun auzo elkarteok informazioa izan behar dugula gure auzoen etorkizunerako hain garrantzitsua den proiektu honetan gure ikuspegia eman ahal izateko”, esan dute bukatzeko.
