74. greba egunera iritsi dira Pasaiako etxez etxeko langileak
Atzo arratsaldean manifestazioa egin zuten Trintxerpetik Albaolara. "Prekarietatetik ateratzeko determinazioz" daudela baietsi dute.
Etxez etxeko langileen manifestazioa, atzo San Pedron. Irailaren lehen egunetik daramate Pasaiako etxez etxeko zerbitzuaren langileek greba mugagabean. Atzokoa 74. borrokaldi eguna izan zuten: arratsaldez, manifestazioa egin zuten Trintxerpen hasi eta San Pedroko Albaola ingurura, han elkarretaratzea egiteko ELA eta LAB sindikatuetako ordezkarien ekimenez. Izan ere, San Juan baleontzia uretaratu zuten atzo, eta jendetza espero zela baliatuz, haien aldarrikapenak ahalik eta pertsona gehiagorengana iristeko helburuz egin zituzten atzoko mobilizazioak. Irmo darraite borrokaldiarekin, “prekatietatetik ateratzeko determinazioz”, esan dute.
Atzokoan berretsi zuten Pasaiako Udalaren azpikontrata bateko langile direla egun, Matia Goxara enpresako langile alegia: “Enpresa hauek zerbitzua kudeatzen dutenean, beraien etekina handitzea dute lehen helburu. Ondorioz, zaintzaren kalitatea okertu egiten da eta langileon lan eta bizi baldintzak prekarizatzen dira”. Udalari beste behin eskatu diote enpresa presiona dezala euren lan baldintzak duintze aldera, “ez da nahikoa udalak enpresa kontratatzeko partida ekonomiko bat jartzea”.
Atzokoan, euren eskaera orokorrak zabaltzeko aukera ez zuten galdu langileek. Honakoak dira, haien hitzetan:
- Soldata duin bat eskatzen dugu, gaur egun lan berdina egiten duten langileak baino %50 gutxiago kobratzen dugulako.
- 28 orduko gutxieneko lanaldia eskatzen dugu, gaur egun gure lanaldiak hain txikiak dira, ez digutela soldata duin bat izaten uzten eta, gainera, telefono dei baten pendiente egon behar gara hau osatzeko, lan eta familia-bizitza uztartzea zailduz.
- Enpleguaren egonkortzea eta lanaldiaren jaitsiera eskatzen dugu, gaur egun langileon %75ak lanaldi partzialak ditugulako.
- Bajak %100 osatzea, gaur egun, gura soldatak kontutan izanik eta gizarte segurantzak ordaintzen duena, ezin garelako gaixotu.
HITZAk jakin ahal izan duenez, joan den astean Pasaiako Udalak, Matia Goxarak eta langileen ordezkariek batzarra egin zuten gaiari soluzioa emateko bidean aurrera urratsak adosten hasteko.
