Ijito kultura ezagutarazi eta estereotipoak ezabatzeko
Ijito Kultur Astea egingo dute Kamelamos Adikerar elkarteak antolatuta, gaurtik hasi eta ostirala arte. Gaur aurkeztuko da, gaurtik bertatik hasita, ostirala arte egingo duten egitaraua.
Bea Martin eta Kamelamos Adikerar elkarteko kideak gaur astea aurkezten. Ijito kultura herritarrei gerturatu eta haien gainean dauden estereotipoak, gutxiesgarriak eta ezkorrak guztiak, ezabatzea du helburu Ijito Kultur Asteak. Gaur aurkeztu dute aurtengo ekitaldia Kamelamos Adikerar elkarteko Juan Carlos Jimenez Barrul eta udaleko Kultur dinamizatzaile Bea Martin Marcosek. Gaurtik hasita, ostiralera arte hainbat jarduera antolatu ditu ijito elkarteak udalaren laguntzarekin.
Asteak hogeita hirugarren ekitaldia du aurtengoa. Ijito kultura ikustaraztea duela helburu Kamelamos Adikerar elkarteak azaldu du Jimenezek astearen bidez, “Ijito Herriaren iritsieraren 600. urteurrena beteko da aurten, 1425eko urtarrilaren 12an heldu zen, eta hori ere ospatu nahi dugu”. Sei mende igarota ere, oraindik orain, “ezagunak” izaten jarraitzen dutela aitortu du Jimenezek, “gu eta gure kultura estereotipoekin lotzen jarraitzen du jendeak oro har, gauza ezkorrekin lotzen da gure herria, gure kultura, gure herria eta gure pentsaera benetakoa, ezagutu gabe. Elkartearen bidez jendea gerturatzea gugana, sareak sortu eta elkarbizitza giroa sustatzea bilatzen dugu, ijito kulturarekin interesa izatea azkenean aberasgarria delako, guretzat beste kulturak ezagutzea aberasgarria den bezala”.
Hori horrela, herritar guztiak deitu ditu antolatutako ekitaldietara. Horiek, haur, gazte, zein adinekoei begira antolatu dituzte.
Gaur gaurkoz ijito jatorriko 60-70 bat familia bizi dira Errenteria-Oreretan. Asteak ematen duenarekin pozik azaldu da Jimenezek, “ilusio handiz antolatzen dugu astea, oso polita da guretzat. Aste honetan jendea gerturatzen da, Ijito Herriaren Nazioarteko Egunarekin gertatu ohi den bezala—apirilaren 8a da—, ateak irekitzen dizkigute, onartzen zaigu”. Onarpen hori, ate irekitze hori, egunerokoa izatea nahi dutela gaineratu du Jimenezek, “ez dugu nahi jendea bakarrik gerturatzea guregana data zehatzetan, nahi dugu jendeak kontuan har dezan herri honen parte garela, komunitate anitz honen zati garela gu ere. Ezagutu nahi gaituen orok hemen aurkitu gaitu, gure errealitatea lehen eskutik ezagutu nahi duenarentzat”.
Bea Martinek eskerrak eman dizkio Kamelamos Adikerar elkarteari egiten duenlanarengatik, eta gogora ekarri du udaleko hainbat sailek egiten dutela bat astearen antolaketarekin, “Kultura, Kirola eta Gazteria sailek egiten dute bat, modu batean edo bestean lotura duelako antolatutako ekitaldiekin”.
Bukatzeko herritar guztiak deitu dituzte Marinek eta Jimenezek parte hartzera. Egitaraua, ondoko taulan.
Ijito astearen egitaraua
Gaur, astelehena
- 10:00-12:30. Ijito Kafea, Zumardiko kioskoan.
- 20:00-21:00. Montxo Jimenez Esku Pilota Txapelketa. Mindara-EPLE, Fanderiako Agustina Otaola pilotalekuan.
Bihar, asteartea
- 18:00-19:30. Flamenko kaxoi ikastaroa Kaputxinoetako ludotekan.
Etzi, asteazkena
- 19:00-21:00. Montxo Jimenez Esku Pilota Txapelketa, Fanderiako Agustina Otaola pilotalekuan.
Hilak 13, osteguna
- 18:00-19:00. Ijitoen historiari buruzko hitzaldia, Gabierrotako Gastelekuan.
Hilak 14, ostirala
- 19:00-20:00. Montxo Jimenez Esku Pilota Txapelketa, finala eta sari banaketa, Fanderiako Agustina Otaola pilotalekuan.
