Trintxerpeko Euskararen Eguna, hilaren 28an eta 29an
Trintxerpeko Korkoiburuek eta barrutiko eragileek egitarau zabala ondu dute euskara goratzeko. Ospakizunen epizentroa Gudari plazako karpa izango da.
Trintxerpeko Euskararen Eguneko bazkari bateko irudia.Trintxerpeko Korkoiburuak Euskararen Eguna gainean da. Abenduaren 3a da ospakizunen epizentroa. Trintxerpen, baina, aurrea hartuko diote egun horri, Trintxerpeko Korkoiburuek hilaren 28an eta 29an ospatuko baitituzte euskara goratzeko jarduerak. Korkoiburuek, gainera, Ekaitzaren, Bovedaren, Pasaiako Zinema Txikiaren, Karmengo Amaren, Trintxerpe Kirol Elkartearen eta Illunbe Dantza Taldearen laguntza izan dute egitaraua ontzeko. Karpa Gudari plazan kokatuko dute.
Hilaren 28an (ostiralarekin) haurrei begirako jarduerak egingo dituzte Serafin Esnaola plazan. 17:00etan puzgarriak jarriko dituzte, eta 18:00etan jolasen txanda izango da. Euria egingo balu, jarduerak frontoira lekualdatuko lituzketela jakinarazi dute sustatzaileek.
Egun handia hilaren 29koa (larunbatarekin) izango da. Goiz osoan zehar, Karmengo Amako ikasleek ikasbidaiarako postua jarriko dute Serafin Esnaolan. 12:00etan, haurren tailerrak egingo dituzte leku berean. 13:00etan, dantza poteoa egingo dute, Euskadi etorbidetik abiatuta. Serafin Esnaolatik pasa ondoren, Gudari plazan bukatuko dute ibilbidea.
14:30ean, herri bazkaria egingo dute karpan. Helduen menuak 15 euroko prezioa du, eta urdaiazpikoa eta solomoa, patea, haragi paella, postrea, kafea, ura, sagardoa eta ardoa sartu dituzte. Haurren menuak, aldiz, 8 euroko kostua du, eta urdaiazpikoa eta solomoa, haragi paella, fruta zukua, postrea, ogia eta ura dastatuko dituzte. Hilaren 24a (astelehena) da bazkariko txartelak eskuratzeko azken eguna. Horiek Maite eta Erdibana tabernetan eros daitezke, eta helduen tiketen 3 euro Karmengo Amako ikasbidaira bideratuko dituzte.
Sabelak bete ondoren, programazioak jarraipena izango du arratsaldean. 16:30ean, kafe dinamizatua egingo da karpan. 17:30ean, Zinema Txikiak Etxean bakarrik filma proiektatuko du alkateordetzan. 18:00etan, Bidean erromeriak dantzan jarriko ditu karpan bildutakoak. Azkenik, 21:00etan, guatekea izango da karpan.
Trintxerpeko Euskararen Eguna
Hilak 28, ostirala
- 17:00: Haurren puzgarriak. Serafin Esnaola plazan.
- 18:00: Haurren jolasak. Serafin Esnaola plazan.
Hilak 29, larunbata
- 12:00: Haurren tailerrak. Serafin Esnaola plazan.
- 13:00: Dantza poteoa, Euskadi etorbidetik.
- 14:30: Herri bazkaria. Gudari plazako karpan.
- 16:30: Kafe dinamizatua. Karpan.
- 17:30: Zinema Txikia, Etxean bakarrik filma. Alkateordetzan.
- 18:00: Bidean erromeria. Karpan.
- 21:00: Gautekea. Karpan.
