Jesusen Bihotza egoitzako ELAko langileak, greban
Abenduaren 19ra arte jarraituko dute greban, lan baldintzak parekatu eta hitzarmen berri duina galdegin dute ELAko langileek.
Erresidentzietako ELAko langileen aurreko protesta bat Aurten berritzekoa zuten hitzarmena negoziatu, eta erresidentziako langileen lan baldintzak duintzea eskatzeko protesta egiten ari dira Jesusen Bihotza zaharren egoitzako ELAko langileak. Jakinarazi dute mahaia biltzen hasi zela aurtengo urtarrilean, baina apirilaz geroztik ez dela ez bilerarik egin ezta enpresen proposamenik jaso, “patronalak erantzun ere ez die egin gure eskaera eta proposamenei”.
Hori horrela, protesten bideari ekin zioten erresidentziako ELAko langileek, zehazki hamabi greba egun egin dituzte ekaina, uztaila, iraila eta azaro artean. Greba egunak gorabehera, egoerak bere horretan jarraitzen duela-eta, abenduaren 19ra arte greba egitea erabaki dute orain, “langileon eskaerak aintzat hartu eta negoziazioaren bidea zabaltzeko”.
Protestarako arrazoiak aletu dituzte sindikatu horretako ordezkariek. Aurretik aipatutako hitzarmenaren negoziazio prozesua etenda izateaz aparte, arloko lan baldintzei jarri diete fokua. Hala, besteak beste, enpleguak okerrera egin duela azken urteetan adierazi dute, “langileen ia erdiak kontratu partziala du. Ondorioz, soldata baxuagoak, lanerako egutegi malgua, telefonoaren menpe, langile zaurgarriak…”. Lan bera egiten duten langile publiko batekin alderatuta urtean 10.000 euroko soldata arrakala dutela ere esan dute, “besteak beste egoera hori gaindituko duen hitzarmena da adostu nahi duguna”. Ezinbestekoa jo dute ELAko langileek bai enpresek, baita zerbitzua finantzatzen duen aldundiak arrakala hori kontuan hartu eta “langileak prekarietatetik aterako dituen enplegua bermatzea”, horretarako %100eko kontratuak sustatuta.
Neurri horiek ez<arri gabe, ezinbestekoa jo dute Gipuzkoako erresidentzia eta eguneko zentroetan kalitatezko zerbitzurik ematea.
Beste alderdi bati ere erreparatu diote greba egingo duten langileek, ratioei, hain zuzen ere. Horiek igotzea “nabarmen” proposatu du: “Urteak daramagu salatzen egoiliarrei ematen zaien zerbitzua oso exkaxa dela; pertsonengan zentratutako zaintza eredua ratioak hobetuta baino ez da lortuko”.
Greba egingo dute, baina protesta kalera ere aterako dute, eta hainbat mobilizazio iragarri dituzte Jesusen Bihotza egoitzaren parean, zein herriko kaleetan. Lehena bihar izango da, 11:00etan, egoitzaren aurrean. Parte harztera deitu dituzte herritarrak, “kalitatezko zaintza publikoa behar dugu herritarrok, eta guztion artean borrokatuz, zaintzaren duintasuna aldarrikatuz, lortuko dugu”.
