Luzuriagak aparkatzeko plaza libre gehiago izango ditu
Udalak behin-behineko erregulazio eredu berri bat ezarriko du, txartelik gabeko bizilagunentzako edo bisitarientzako plaza libreen kopurua handituz.
Antxoko Luzuriagako aparkalekuan plaza libre gehiago jarriko dituela iragarri du Pasaiako Udalak. Udal erakundeak behin-behineko erregulazio eredu berri bat ezarriko du eremu horretan, txartelik gabeko bizilagunentzako edo bisitarientzako plaza libreen kopurua handituz. Banaketa berriarekin, espazioak mugarik gabeko ehun plaza libre inguru izango dituela jakinarazi du udalak. Toki horietan, besteak beste, Antxon erroldatuta ez dauden ibilgailuek edo arrazoi administratiboengatik bertako txartelik ez dutenek aparkatu ahal izango dute.
Luzuriagak dituen 125 plaza misto mantenduko direla aurreratu du udalak. Toki horiek 19:00ak arte aparkatzeko aukera emango dute, eta gaueko ordutegian zein asteburuetan bertakoentzat soilik izango dira.
Bestalde, A1 txartela duten pertsonek erabilera esklusiboko 200 plaza baino gehiago izaten jarraituko dute egun osoan, eta horiei 125 plaza mistoak gehituko zaizkie, 19:00etatik aurrera eta asteburuetan txartela dutenek bakarrik erabili ahal izango dituztenak. Bertako txartela duten ibilgailuek eremu libreetan ere aparkatzeko aukera izango dutela adierazi du udalak. Hala ere, baimena dutenei erreserbatutako plazak erabiltzeko eskatu die udalak. Erregulazio berria aparkalekuaren sarreran jarriko den panel baten bidez seinaleztatuko du udal erakundeak.
Oinezkoentzako gunearen berrantolaketa
Aparkalekuen banaketa berriarekin, Luzuriagako aparkalekuaren eta ibaiaren arteko oinezkoentzako gunea ere antolatuko du udalak, orain arte erabilera libreko gunea izan dena. Jarduketa horretatik aurrera, plazak margotuta eta mugatuta geratuko dira, inguru horretako oinezkoek lehentasuna izango dutela bermatzeko. Orain arte, eremu horretako gune libre bakarra zerrenda hori zen; eredu berriarekin, baina, plaza gehigarriak egokituko dira aparkalekuaren barruan, oinezkoentzako espazioaren gaineko presioa saihestuz.
Berregokitze horrek erroldatuta ez dauden herritarren edo bestelako arrazoiren batengatik txartela ez dutenen gaitasuna nabarmen handitzea dakarrela baietsi du udalak. Aldi berean, bertakoen lehentasuna bermatuko duela jakinarazi du udal erakundeak, batez ere gaueko tartean, orduan beharra handiagoa izango baita.
Malgutasunean eta entzutean oinarritutako erabakia
Udalak neurri hori hartu du Antxon Aparkatzeko Ordenantzaren bilakaera aztertu ondoren, Eskalantegi bikoiti, Darieta bidea, Lorete bidea eta beste eremu mugakide batzuetako bizilagunei entzun ondoren, eta Antxon egunero bizi diren baina hainbat administrazio egoera direla eta bertakoen txartela eskuratu ezin duten pertsonekin izan ondoren.
Honakoa adierazi du Mikel Garcia Peñil Mugikortasun zinegotzi eta Antxoko alkateordeak: “Ordenantza diseinatzen hasi ginenetik argi utzi genuen araudi bizia eta malgua izango zela, eta izaera murriztaileagoarekin hasiko zela, egoiliarrek arazorik gabe aparkatu ahal izatea hasieratik bermatuko zuena. Bigarren fasea martxan jarri zenetik, egoera hori Antxon zailtasunik gabe gertatu dela ikusi dugu, eta, zehazki, Luzuriagan egunero lehen azterketa bat egin dugu, gauero bertakoen eremuan dozenaka plaza libre geratzen zirela ondorioztatuz. Herritarrekin hartutako konpromisoarekin jarraituz, araua pixkanaka egokitzen joango da, barruti eta zonalde bakoitzaren kasuistika eta beharretara, eta horixe egingo dugu orain Antxon. Luzuriagako espazioaren planteamendu berri bat egingo dugu, barrutiaren egungo premiekiko errealistagoa izango delakoan. Nolanahi ere, proba sistema izaten jarraituko du, eta egokitzapen berriak egin ahal izango ditu, hautematen diren beharren arabera”.
Laguntza bat
Garciak zehaztu du neurri berri horrek ez duela konponduko Antxon bizi diren eta Donostian erroldatuta dauden pertsonen egiturazko arazoa: “Laguntza bat izango da, eta hala izan nahi dugu. Baina ez da Eskalantegi bikoitian erroldatuta dauden 200dik gora auto horien jabeek behar duten egiturazko eta behin betiko irtenbidea. Antxon plazak oso mugatuak dira eta ez dira nahikoak erroldatu gabeko herritar guztien beharrei erantzuteko”.
Mugikortasun zinegotziak adierazi du Pasaia errealitate horiek integratzeko lanean ari dela, baina Donostiako Udalaren erantzun eza ere jarri du mahaiaren gainean. 2024ko otsailean jo zuen lehen aldiz Pasaiako Udalak Donostiakoa, eta proposamen zehatz baten zain jarraitzen du: “Gaur egun, urte eta erdi baino gehiago bilera tekniko eta politiko ugari egin ondoren, Donostiako Udalaren erantzun bakarra alde bakarreko eskakizuna izan da: Pasaian bizi ez diren eta horretarako legezko baldintzak betetzen ez dituzten pertsonei egoiliar txartelak ematea. Proposamen gehigarririk, lankidetzarik eta konpentsazio formularik ez”.
Pasaiako Udalak gogorarazi du hiru irtenbide “errealista eta bideragarri” planteatu zizkiola Donostiakoari:
- Muga administratiboak berrikusi bizilagun horiek pasaitar izatera igaro zitezen eta Pasaian fiskalki lagundu zezaten, udal horri aparkaleku aukera berriak sortzeko baliabideak emanez.
- Donostiak aparkaleku bat sortzea inguruko lurretan, bere herritarren zerbitzura.
- Pasaiari lur gaineko edo altuerako plaza berriak gaitzeko aukera emango dion ekarpen ekonomiko finalista.
Udala, gainera, barrutian aparkaleku berriak gaitzearen bideragarritasuna aztertzen jarraitzen duela jakinarazi du Garciak: “Oraindik badaude konpondu behar ditugun alderdi tekniko eta administratiboak, baina espero dugu herritarrei arrazoizko epe batean informazio zehatza eskaini ahal izatea. Guretzat hiru bide hauek erabat irekita jarraitzen dute. Pasaiak laguntzeko eta irtenbide partekatuak bilatzeko prest jarraitzen du. Benetan Donostiako Udalak bere herritarrei bizkarra ematea erabakitzen badu, pasaitarrak izatera ahalbidetu dezala; eta bestela, legez eta moralki dagozkion zerbitzuak eta arretak eman diezazkiela”.
