"Hezkuntza Sailak Akordio Laboralean hartutako konpromisoak bete behar ditu"
Ikastoletako langileek mobilizazioak eta gaualdiko itxialdiak egin dituzte. Hezkuntza Sailari hitzartutako akordioak bete ditzala eskatu diote.
Atzo eta gaur artean mobilizazioak egin dituzte Orereta Ikastolako, Pasaia-Lezo Lizeoko eta Haurtzaro Ikastolako langileek. Horien xedea izan da 2023eko ekainaren 1ean Hezkuntza Sailak eta LAB sindikatuak sinatutako Akordio Laborala gauzatzea: Ikastoletako langileoi dagokigun atala, ordea, ete gabe >dago. Alde batetik, ikastoletako langileen eta sare publikoko langileen arteko soldata parekatzea adostu bazen ere, parekatze hori ez da langile guztiengan gauzatu. Bestetik, lan baldintzek berdintzera jotzeko azterketa egiteko konpromisoa hartu zen, baina ezarritako epea aspaldi gaindituta ere, ez zaio ekin”. Ia bi urte eta erdiko epean “inongo aurrerapausorik eman ez izana” leporatu diote Eusko Jaurlaritzako Hezkuntza Sailari, “ez da onargarria sinatutakoari ez heltzeagatik ikastoletako langileon lan baldintzak ez hobetzea. Sailak Akordio Laboralean hartutako konpromisoak bete behar ditu”.
Pasaia-Lezo Lizeoko langileek elkarretaratze zaratatsua egin zuten lehenik, hezkuntza komunitateko lagunekin batera, Antxoko Gure Zumardian 18:30ean hasita. Handik Lezoko Ikastolara joan ziren, gau osoko itxialdia bertan egin zuten. Orereta Ikastolako langileak, berriz, Esmalteriako plazan elkarretaratu ziren, haien egoitzaren ondoan. Haurtzaro Ikastolako beharginak, ordea, 19:30ean bildu ziren Done Eztebe plazan mobilizazioa egin eta argazki jendetsua ateratzeko; ondoren ikastolako itxialdirantz egin zuten. LABek deitutakoak izan ziren mobilizazio horiek guztiak.
“Herri honek behar duen Hezkuntza Sistemaren eraikuntzan jarraitu nahi dugu. Zuen seme-alabei eskubidez dagokie hezkuntza duina, eta hori langileen lan baldintzekin lotuta dago ezinbestean”, adierazi dute langileek.
Jarraian, Lizeoko, Orereta Ikastolako eta Haurtzaro Ikastolako langileen irudiak eta bideoa (Antxokoa, Lizeoko langileena).
