"Jaso zuen txakurren kakak"
Haurren aisiarako kaleko eremuetan txakurren kakak maiz agertzen direlako kezka eta haserrea azaldu ditu San Pedroko guraso talde batek.
Klerarekin garbitasuna eskatzeko pintaketak egin dituzte San Pedroko pilotalekuan. San Pedroko haurrek eta gurasoak “etsita” daude, eta duten sentsazioaren berri eman nahi diete herritarrei. Ezinegon mezua zabaltzeaz gainera, ardurak eskatu dituzte. Izan ere, kexu dira San Pedroko haurren jolaslekuetan, frontoian, parkeetan, Proisako orubean, edo toboganeko zonaldean egunero-egunero agertzen direlako txakurren kakak, “bat baino gehiago, eta noski, zapaldu ondoren zabaltzen joaten dira”. Hala, txakurren jabeei esan diete ardura daitezela euren animalien gorotzaz; udalari eskatu diote dagokion ardura har dezala gaian.
“Gure haurrak arrastaka, jolas librean izaten dira. Eta azkenean kakaztuta datoz gurasoongana”, zehaztu dute sanpedrotarrek: “Gurasook jaso behar izaten ditugu gureak ez diren txakurren kakak. Pixa arrastoak ere edonon azaltzen dira. Gure haurrek kaka egiteko gogoa dutenean ez dute frontoi erdian egiten”. Erantzukizuna. Hori eskatu diete animalien jabeei. Haserre daude gurasoak: “Jaso zuen txakurren kakak”.
Klerarekin egindako pintaketak ere agertu dira frontoiaren paretan: Ista, ista, ista. Frontoia kaka pista, dio horietako batek.
San Pedroko pilotalekuan, txakur kaka orbanak.
