Euskararen aldeko adierazpen instituzionala egin du udalak
EUDEL Udalerri Euskaldunen Mankomunitatearen adierazpenarekin bat egin du Errenteriako Udalak.
euskaraldiaren harira adierazpen instituzionala egin du Errenteriako Udalak.Izaro Perez Loperena Euskararen Nazioarteko Eguna da gaur, eta horren harira, adierazpen instituzionala egin du Errenteriako Udalak. Zehazki, EUDEL Udalerri Euskaldunen Mankomunitateak egin duen Euskara zugan, nigan, gugan manifestuarekin bat egin du udalak. Albistearen bukaeran irakur daiteke hori, hitzez hitz.
Euskararen Egunaren bueltan hamabostaldia antolatua du Errenteriako Udalak herriko hamaika eragilerekin elkarlanean. Horren barruan, azaroaren 17an hasita, hilaren 8ra bitartean egiten ari dira hamabostaldia, eta horren barruan espresio anitzak baliatzen ari dira euskara erdigunean jarri eta arnasguneak eraikitzeko. Tailerrak, ikuskizunak, hitzaldiak, liburu aurkezpenak, kirol saioak… arlo denak ukitu dituzte, denak saretu dira, euskararentzat agertoki oparoagoa erdiesteko.
Gaur Bertanherri kantaldia izango da Herri Arte Eskolan, Udal Txistulari taldea eta Lorea Intxaurrandietaren eskutik, 19:00etan. Bihar berriz, Badalabek hartuko du lekukoa Hitzei jarritako hitzak tailerrarekin; bertsoak eta narrazioa landuko dituzte bertan 19:00etan hasita. Hilaren 5ean, ostirala, Doinuz kalerik kale, kantuz plazarik plaza jarduerarekin musikaz beteko dute erdialdea, 17:30ean hasita, kantu jirak eta Herri Arte Eskolak.
EUDELen manifestua
Euskara ZUGAN, NIGAN, GUGAN
EUSKARAREN NAZIOARTEKO EGUNA 2025
Euskarak bide luzea egin du.
Luzeena, agian, Europa zaharrean.
Eta hala ere, bere bidea ez da amaitu: bizirik dirau, hazi eta berritzen ari da.
Zein da sekretua?
Zein indar, zein ilusio izan da gure hizkuntza gaur arte ekarri duena?
Milaka urte, milaka pertsona, milaka amets eta ahalegin.
Norbanakoen indar isilak, belaunaldiz belaunaldi, gure hizkuntza zaharra gazte bihurtu du.
Debekuen aurrean, eutsi genuen.
Isilaraztearen aurrean, hitza berreskuratu genuen.
Euskara, gure zaharren hizkuntza izatetik, gazteen hizkuntza izatera pasa da.
Argi-izpi berri hauekin marraztuko dugu etorkizuna.
Euskararentzat aukera berriak zabalik daude.
Hazi eta berritu dadin lanean ari gara.
Bizi garen mundu nahasi eta aldakor honek, ordea, zaildu egiten du komunitatearen indarra eta zentzua.
Hiztun-komunitatea ez da berez mantentzen.
Zaindu, elikatu eta piztu egin behar da.
Horregatik, unea da.
Euskararen erabilerarako eta transmisiorako bide berriak jorratzeko unea.
Aisialditik lan munduraino, eta norbanakotik erakundeetaraino, euskaraz hitz egiteko gune erosoak sortzeko unea.
Belaunaldi berrien artean euskararen transmisioa indartzeko unea.
Euskararen ezagutza zabaltzeko unea.
Erabilera sustatuko duten ingurune biziak zaindu eta berriak irabazteko unea.
Euskararen biziberritze-prozesuari segurtasuna emateko indarrak biltzeko eta urrats berriak eta ausartak egiteko unea.
Asko dugu egiteko, badugu zer hobetu.
Eta prest gaude!
Euskaraz dakiten eta oraindik ez dakitenekin batera.
Elkarrekin egiteko.
Eskerrik beroena urte luzez euskara bizi, euskaraz bizi eta biziarazi dutenei.
Zuen lan isilak ekarri gaitu honaino, eta etorkizunak oraindik ere zuen beharra du.
Pozetik, atxikimendutik, ilusioz eta emozio positiboetatik abiatuta, euskarari distira emateko,
Eta euskara guztion hizkuntza bihurtzeko.
Euskara da!
Guztiontzat da.
Euskara ezagutzen ez dutenentzat ere, ate berri bat da.
Batzen gaituen hizkuntza bat.
Elkar ulertzeko gonbidapen bat.
Mundu berri bat irekitzen zaio euskarari.
Eta euskararekin, edonori.
Ate berriak zabaldu eta lur zoru berriak landuko ditugu, denon artean.
Hazi emankorragoak ditugu lur berria ereiteko.
Atzeak erakuts diezagula aurrea nola dantzatu.
Norberetik hasita egingo dugu bidea.
Guztion baitan baitago euskararen jauzia.
Zugan, nigan, gugan.
