Euskararen Eguneko udalaren adierazpena eta ekitaldia, Lezon
Hainbat erakundek adostutako adierazpenarekin bat egin du udalak, eta hainbat konpromiso berretsi ditu. Arratsaldean, ekitaldiak.
Euskararen Eguna da gaurkoa. Horren harira, Lezoko Udalak erakunde adierazpena jendartera zabaldu du. Adierazpen kolektiboa da, hori adostu dutenak Lezoko Udalean ordezkaritza duten alderdi politikoak, UEMA, EUDEL, Eusko Jaurlaritza, eta Bizkaiko, Arabako eta Gipuzkoako aldundiak izan direlako. Beheko koadroan ikus daiteke olerki izaerako erakunde adierazpena.
Lezoko Udalak, bere aldetik, hainbat konpromiso bere egin ditu gaurko egunaren harira. Horiek egikaritzeko eguneroko lanean ari dela adierazi du udal erakundeak, baina gaurko Euskararen Egunaren harira horiek nabarmenera ekartzea erabaki du. Udal politiketan euskara erdigunean jartzeko konpromisoan irmo lanean ari dela adierazi du udalak, eta azpimarra jarri du hizkuntza politiketan ez duela atzera urratsik egingo. Aldi berean, “euskarak behar duen jauzian” udalak bere ekarpena egingo duela ziurtatu du, “horretarako bitartekoak jarriko ditugu”.
Arratsaldean, jarduerak
Atzoko ludotekako prestaketa tailerraren ondoren, gaurko, Euskararen Egunerako, ekitaldi sorta antolatu dute herriko hainbat eragilek. 17:00etan hasiko dira. Hasteko eta behin, asmoa da horiek Gurutze Santuaren plazan egitea, baina eguraldiak lagunduko ez balu Lezo Herri Eskolako aterpera mugituko lituzkete. Lehenik eta behin askari partekatu girotua izango da, eta 18:00etatik aurrera elkarretaratzea, ekitaldia, kalejira eta bingo txarangatu-musikatua egingo dituzte.
Erakunde adierazpena, udalak eta beste hainbat erakundek adostutakoa
Euskara ZUGAN, NIGAN, GUGAN
EUSKARAREN NAZIOARTEKO EGUNA 2025
Euskarak bide luzea egin du.
Luzeena, agian, Europa zaharrean.
Eta hala ere, bere bidea ez da amaitu: bizirik dirau, hazi eta berritzen ari da.
Zein da sekretua?
Zein indar, zein ilusio izan da gure hizkuntza gaur arte ekarri duena?
Milaka urte, milaka pertsona, milaka amets eta ahalegin.
Norbanakoen indar isilak, belaunaldiz belaunaldi, gure hizkuntza zaharra gazte bihurtu du.
Debekuen aurrean, eutsi genuen.
Isilaraztearen aurrean, hitza berreskuratu genuen.
Euskara, gure zaharren hizkuntza izatetik, gazteen hizkuntza izatera pasa da.
Argi-izpi berri hauekin marraztuko dugu etorkizuna.
Euskararentzat aukera berriak zabalik daude.
Hazi eta berritu dadin lanean ari gara.
Bizi garen mundu nahasi eta aldakor honek, ordea, zaildu egiten du komunitatearen indarra eta zentzua.
Hiztun-komunitatea ez da berez mantentzen.
Zaindu, elikatu eta piztu egin behar da.
Horregatik, unea da.
Euskararen erabilerarako eta transmisiorako bide berriak jorratzeko unea.
Aisialditik lan munduraino, eta norbanakotik erakundeetaraino, euskaraz hitz egiteko gune erosoak sortzeko unea.
Belaunaldi berrien artean euskararen transmisioa indartzeko unea.
Euskararen ezagutza zabaltzeko unea.
Erabilera sustatuko duten ingurune biziak zaindu eta berriak irabazteko unea.
Euskararen biziberritze-prozesuari segurtasuna emateko indarrak biltzeko eta urrats berriak eta ausartak egiteko unea.
Asko dugu egiteko, badugu zer hobetu.
Eta prest gaude!
Euskaraz dakiten eta oraindik ez dakitenekin batera.
Elkarrekin egiteko.
Eskerrik beroena urte luzez euskara bizi, euskaraz bizi eta biziarazi dutenei.
Zuen lan isilak ekarri gaitu honaino, eta etorkizunak oraindik ere zuen beharra du.
Pozetik, atxikimendutik, ilusioz eta emozio positiboetatik abiatuta, euskarari distira emateko,
Eta euskara guztion hizkuntza bihurtzeko.
Euskara da!
Guztiontzat da.
Euskara ezagutzen ez dutenentzat ere, ate berri bat da.
Batzen gaituen hizkuntza bat.
Elkar ulertzeko gonbidapen bat.
Mundu berri bat irekitzen zaio euskarari.
Eta euskararekin, edonori.
Ate berriak zabaldu eta lur zoru berriak landuko ditugu, denon artean.
Hazi emankorragoak ditugu lur berria ereiteko.
Atzeak erakuts diezagula aurrea nola dantzatu.
Norberetik hasita egingo dugu bidea.
Guztion baitan baitago euskararen jauzia.
Zugan, nigan, gugan.
