Donibaneko eta Lezoko boluntarioak Saharan gogor lanean
Bixi Bixi elkartearen ekimenez, hainbat herritar Saharan dira laguntza, babes eta boluntario lanak egiten. Besteak beste, gaixoen txostenak informatizatzen ari dira.
Donibaneko eta Lezoko boluntarioak, Sahararantz irten aurretik. Hilaren 28an abiatu ziren Donibanetik eta Lezotik Sahara aldera boluntario talde bat; Euskal Herriko beste hainbat herritako dozenaka kide ere joan ziren hara. Hango errefuxiatuen kanpamenduetan etenik gabeko lanean ari dira ordutik, “egunak luze eta era berean motz geratzen dira, hainbeste gauza egin nahi eta denborarik ez!”, adierazi dute boluntarioek sare sozialen bidez. Izan ere, Donibaneko Bixi Bixi elkartearen ekimenez joan dira hara bertako boluntarioak; eragile sanjuandarren sare sozialetan izan daiteke Sahara aldean egiten ari direnaren berri, informazio testu eta irudi bidez.
Egoera oso prekarioan dauden eskoletan hobetze ahaleginak egin, familiekin eta emakumeekin zuzenean hitz egin dituzten beharrez aritzeko eta ahal dela laguntza zuzena emateko, Saharako agintariekin bilerak izan lehen eskuko informazio eguneratua izateko, aurrekoetan Euskal Herrian izan diren umeekin egon… Lan nekeza, handia dute han egunotan. Tartean, osasun arloko bat: hango gaixoen txostenak eta fitxak informatizatzen ari dira, horretarako beharrezkoak diren baliabide tekniko eta informatikoak erraztuz.
Aurretik etenik gabeko lanerako hainbat egun dituzte boluntarioek. Jarraian datozen irudiak han egiten ari diren lanaren lekuko dira (Bixi Bixiren Facebook orrialdetik hartutakoak dira).
