"Itxaropenerako garaia da"
Euskararen Eguneko jarduerak egin zituzten atzo Lezon. Euskarak bizi dituen zailtasunak azaldu, eta pizkunderako deia egin zuten.
Lezoko familiek bat egin zuten atzo berriz ere euskararekin. Euskararen Eguneko ekitaldia aterpean egin zuten, Lezo Herri Eskolako jolastokiaren babespean. Haur asko, gurasoekin, eta mezuekin. Transmisioa. Euskararen oinordekotza, hizkuntza kinka larrian den egoera batean. Transmisio kontzientea euskal hiztunek eta ikasten ari direnek esparruak eta arnasguneak izan ditzaten euskaraz bizitzeko. Hori guztia, txaranga baten doinuek girotua. Herriko eragile euskaltzaleek antolatutako ekitaldiak izan ziren atzoko arratsalde euritsuan egindakoak. Itxaropena ere iritsi zen Lezora. “Itxaropenerako garaia da”, esan zuten ekitaldian. Haurrek era aktiboan parte hartu zuten herritik txarangarekin bira egin aurreko eta ondorengo jardueretan.
Atzoko ekitaldian egindako irakurketan, herriko eragileek azalera ekarri zuten duela 365 egun Saldise plazan aipatutakoa, euskara larrialdi linguistikoan zela, alegia. Hori esateko oinarria euskararen erabileraren datu soziolinguistikoak izan ziren. Horri, UEMAk egindako ikerketaren emaitza gehitu behar zaio zehaztu zuten atzokoan: hizkuntza politiketan jauzia eman ezean, 2036an euskarari ez zaio arnasgune geografikorik geratuko. “Azken hamarkadetako suspertze aroa bukatu eta atzeraldiaren arriskua handia da. Etorkizuna jokoan dago”. Euskal Herriko eremu guztietan euskara ez dela ofizial ere nabarmendu zuten atzokoan, Nafarroako zati askotan eta Ipar Euskal Herrian. Hizkuntzaren kontrako oldarraldi judiziala izan zuten hizketagai, azken aldian maizegi normalizazioaren kontrako epai judizialak iristen ari direlako, eta Hego Euskal Herriko herrialdeetan koofizialtasuna zalantzan jartzen ari delako, “ofizializazio ezaren prozesu bete-betean gaude. Jokoan dago etorkizuna”.
Itxaropena. Bada itxaropenik. Hori adierazi zuten atzokoan mikrofonoa eskuan izan zutenek. Egoera iraultzeko nahia dagoelako, eta euskaltzaleen aktibazioarekin iraultze hori iritsi daitekeelako, norbanakoen, eragileen eta erakundeen arteko elkarlan eta adostasunetik.. “Euskararen etorkizuna bermatzeko oinarria jarriko duen hizkuntza politika eraginkorra behar dugu, herritar orok eragin dezan zuzenean edo zeharka normalizazioaren eta biziberritzearen egunerokoan: hezkuntzan, helduen euskalduntze eta alfabetatzean, euskaltzaleon saretze eta aktibazioan, kulturan, hedabideetan, ezagutza soziolinguistikoaren lanketan, teknologia berrietan..”..
Euskaltzaleen giharra indartzea ezinbestekoa da aurreko guztiari ekiteko. Indar erakustaldiak egiteko aroa da, biltzekoa, elkarrekin arnas hartzekoa, “garena garela ikusaraztekoa”. Bide horretan, Bilbon abenduaren 27an egitekoa den Pizkundea ekitaldira joateko deia egin zuten atzokoan Lezon ere bai.
