Klima aldaketaren eragina arintzeko neurriak aurkeztuko ditu Lezoko Udalak
Lezoko Klima eta Energia Trantsizioaren Aldeko Ekintza Plana da aurkeztuko dena. Hilaren 10erako egin du udalak deialdia, Kultura Aretoan.
Lezoko irudi orokorra. 2024an herriko klima eta energia trantsizioaren diagnostikoa egin eta aurkeztu ondoren, prozesuari ginga jarriko dio Lezoko Udalak hilaren 10eko (asteazkena da) 18:00etan: Lezoko Klima eta Energia Trantsizioaren Aldeko Ekintza Plana herritarrei aurkeztuko die. Horretan 2030era begirako ekintza zehatzak daude jasota, baina ibilbide-orria epe luzeagokoa da, 2050an jarrita baitu begia orain aurkeztu eta aktibatuko den planak. “2024an abiarazi zuen Lezoko Udalak klima-aldaketa eragiten duten berotegi efektuko gasak gutxitzera eta klima-aldaketaren inpaktuetara egokitzeko gai den herriaren alde egiteko ekintza-plana. 2030 urterako denbora-horizontean ezarritako helburuak lortzeko asmoz, klimaren aldeko ekintzan aktiboki jarduteko konpromisoa du udalak”.
Planaren oinarriak ere zehaztu ditu udalak. Honakoak dira, hitzez hitz:
-
Herrian kokatutako sektoreek (udala barne) isuritako berotegi efektuko gasen isurpenak nabarmenki murriztea.
-
Udal jardueran eta Lezon kokatutako gainerako sektoreetan (etxebizitzak, zerbitzuak, industria, lehen sektorea, eta abar) energia aurreztea, energiaren erabilera eraginkorra izatea eta behar den energiaren zatirik handiena 0 Km filosofiarekin bat datorren jatorri berriztagarrikoa izatea.
-
Lezon klima aldaketari lotutako inpaktuek eragin ditzaketen kalteak aurreikustea, prebentzio neurri eraginkorrak finkatzea eta klima aldaketara egokitzeko neurriek herritarren osasunean eta natur ondarean eragin positiboak ekartzea.
-
Lezoar guztiak klima aldaketa eta energia trantsizioan ahalduntzea eta eragile ezberdinen arteko elkarlanerako sareak osatzea.
