Pasaia tentsionatutako eremu izendatzeko prozedura abiatu du Jaurlaritzak
Izendapen horrek, besteak beste, alokairu prezioen mugaketa, kontratuen egonkortzea eta espekulazioaren aurkako neurriak ekarriko dituela adierazi du udalak.
Pasaiako Udalak jakinarazi du Eusko Jaurlaritzak hasiera eman diola Pasaia bizitegi merkatu tentsionatutako eremu izateko prozedurari. Udalak azken hilabeteetan egindako diagnostikoari eta aurkeztutako ekintza planari esker, udal erakundeak adierazi du Pasaiak aukera izango duela etxebizitzaren arloko neurri espezifikoak ezartzeko; hala nola, alokairu prezioen mugaketan eta kontratuen egonkortzean.
Gipuzkoako udalerrien artean, alokairu kostuen presio handiena duen herrietako bat Pasaia dela baietsi du udalak. Pasaiako etxebizitza gastuek familien batez besteko diru sarreren %35,9 gainditzen dute, legeak tentsionatutako eremu izendapenerako ezartzen duen muga (%30) “nabarmen gaindituz”. Egoera horren aurrean, udalak eskaera ofiziala aurkeztu zuen irailean izendapen hori lortzeko. Jaurlaritzak aitortza horri “argi berdea” eman diola jakinarazi du udal erakundeak.
Onarpenaren iragarkia 20 egunez jendaurrean egongo dela zehaztu du udalak, alegazioak eta ekarpenak egiteko. Epe hori bukatuta, eta izendapena indarrean sartzen denean, “Pasaiak etxebizitza merkatuan eragiteari” ekingo diola nabarmendu du udalak.
Tentsionatutako eremuaren izendapenak honako erregulazio mekanismoak ahalbidetzen ditu: alokairu prezioei gehieneko mugak ezartzea; kontratuen egonkortasuna handitzea (errentariaren babeserako irizpide zorrotzagoak aplikatuz, kontratuak gutxienez bost urtez luzatu ahal izateko eta urte arteko igoerak gehienez KPIari lotuta mantentzeko); edota espekulazio edo etxegabetze azkarren aurkako kontrol neurriak areagotzea. Horrez gain, jabe handiek “betebehar zorrotzagoak” izango dituzte, eta udalak hutsik dauden etxebizitzak merkaturatzeko neurriak hartuko dituela jakinarazi du.
Teo Alberro alkateak izendapenak duen garrantzia balioan jarri du: “Etxebizitza eskubide bat da, ezin da inolaz ere luxu bat izan. Pasaian presioa handia da, eta gure herritar askok ez dute prezioei aurre egiteko modurik. Diagnostikoak erakutsi digu egoera konplexua dela, baina sinetsita gaude izendapen honek tresna sendoak emango dizkigula merkatuaren desorekak zuzentzeko eta alokairuak egonkortzeko. Hori da gure lehentasuna: pasaitarrek Pasaian bizi eta Pasaian geratzeko aukera izatea”.
Iraitz Pazos Etxebizitza arloko zinegotziak udalean etxebizitzaren aldeko politikek duten pisua goratu du: “Aspalditik ari gara etxebizitza politikak lehenesten, baina tentsionatutako eremuaren izendapenak jauzi kualitatiboa dakar. Aurkeztu dugun ekintza plana sakona da, eta udalak konpromiso irmoa du prezioen kontrola, espekulazioaren aurkako neurriak eta herritarren babes juridikoa indartzeko”.
