2026ko aurrekontua onartu du plenoak
Udalerriaren lau erronka nagusiri erantzungo dietela aurrekontu horiek adierazi du gobernu taldeak, "hiri berroneratzeko proiektuak areagotzea, gizarte babesa indartzea, trantsizio ekologikoan sakontzea, eta kultura gizarte kohesioaren eta garapen ekonomikoaren eragile gisa sustatzen jarraitzea".
2026ko aurrekontuak onartu diraHerri Bizia Errenteriako Udalak badu 2026rako aurrekontua, asteartean eman baitzioten argi berdea gobernu taldea osatzen duten bi alderdien aldeko botoarekin aurkeztu zuten proposamenari. 72,9 milioi euroko aurrekontua da, iaz baino %7,4 handiagoa jakinarazi dutenez. Hori horrela, aurrekontuak azken urteetako goranzko joerari eusten dio: 2023tik aurrekontua ia 10 milioi euro igo da, eta azken hiru ekitaldietan %15,6ko igoera metatua izan du.
Alde horretatik, Udal Finantzaketarako Foru Funtsaren aurreikusitako igoerak (%10,25ean zenbatetsia), proiektu eta inbertsioei lotutako kanpo finantzaketak eta zerga eta prezio publikoen bilketaren bilakaera positiboak (zerga-ordenantzen aldaketarekin onartutako %2,4ko igoeraren arabera) udalaren aurrekontu sendotasuna eta gastu ahalmen handiagoa finkatzen dutela jarri dute nabarmen.
Udalerriaren lau erronka nagusiri erantzungo dietela aurrekontu horiek ere adierazi dute, “hiri berroneratzeko proiektuak areagotzea, gizarte babesa indartzea, trantsizio ekologikoan sakontzea, eta kultura gizarte kohesioaren eta garapen ekonomikoaren eragile gisa sustatzen jarraitzea”.
Hiri-berroneratzeko proiektuetan, irisgarritasuneko eta mugikortasun bertikaleko proiektu garrantzitsuei jarraipena ematen zaiela adierazi dute, hala nola Pontika – Luis Mariano – Igantzi ardatzari. Laster hasiko dira igogailu berria eraikitzeko lanak, eta 570.000 euro gehiago bideratuko dira horretarako.
Galtzaraborda Planari ere jarraipena emango diote, inbertsioetan 1,2 milioi euro gehiago jarriz. Zehazki 700.000 euro haur eskolako obrak egitera bideratuko dira zeina dagoeneko lizitazio prozesuan dagoen. Gainontzeko 500.000 euroak Parke kaleko berrurbanizatz -lanak eta irisgarritasuna hobetzeko baliatuko dira. Gainera, herritarrekin eta auzoko eragileekin batera prozesu parte hartzaile bat egiteko partida bat ere jaso du, Urdaburu parkearen eraberritzea “kolektiboki diseinatzeko”.
Auzoetako hiri kalitatea hobetzen jarraitzeko, Iztieta-Ondartxon hiltegiko lanei jarraipena ematea jaso dute aurrekontuen barruan. Hiltegiaren lizitazioa laster aktibatuko dela diote, eta 900.000 euro gehiago bideratuko dira obra finantzatzeko.
Olibeten, berriz, ludoteka eta familia gunea zerbitzu berria sortuko da eta 500.000 euro bideratuko dira horretarako.
Gizarte babesa, hori beste erronka handietako bat, eta indartzen jarraituko du Udalak, “gizarte zerbitzuen aurrekontua handituz (2025ean baino % +25,24 gehiago), batez ere etxez etxeko zerbitzua indartzeko eta zaintza-lanak duintzeko apustuagatik, azpikontratatutako langileen eta udal langileen baldintza ekonomikoak parekatuz. Fini Rubio eraikinaren inguruan egindako definizio prozesua bukatzeko, eraikin hori egiteko proiektua idatziko da. Horretarako, 120.000 euroko aurrekontu-partida bat ere jasotzen du aurrekontuak”.
Gainera, eta Eusko Jaurlaritzari Errenteria eremu tentsionatu izendatzeko proposatutako etxebizitza planaren logikari jarraituz, etxebizitza eskuratzea errazteko neurriak indartuko direla azaldu du udalak, “200.000 euro baino gehiago bideratuz hainbat ekintzetan eta herritarrei arreta eta aholkularitza emateko bulego berri bat sortuz”.
Trantsizio ekologikoari ere keinu aurrekontu onartu berriek, “hondakinen kudeaketa hobetzen jarraitzeko apustua nabarmentzen da. Horretarako, gutxi gorabehera 6 milioi euro bideratuko dira hondakinen kudeaketa, bilketa eta tratamendura”.
Energia berriztagarrien arloan, udal ekipamenduetako teilatuetan plaka fotovoltaikoak instalatzea bultzatzen jarraituko duela esan du, eta horretarako guztira 440.000 euro proposatzen dira. Horrez gain, 1.700.000 euro bideratuko dira berdegune berriak sortzeko, Barandiaran Parkea kasu; azken horren lanak lizitazioan daude.
Azkenik, mugikortasun iraunkorra sustatzeko, 1.109.000 euro erabiliko dira garraio publikoa bultzatzen jarraitzeko, 2025ean baino % 16,37 gehiago. Era berean, 500.000 euroko aurrekontu partida bat bideratuko da Askatasunaren Martirien kaleko aparkalekua eraikitzeko, Olibet auzoko bizilagunei eta RENFEko geltokiari zerbitzua emango diena.
Azpimarra jarri dio azkenik udalak, kulturan dauden lan ildoak indartzearen aldeko apustuari, “% 11,64ko aurrekontu igoerarekin, bai eta Altzaten ahotsaren eta musikaren etxea eraikitzeko lanak hasteko aurrekontu zuzkidurarekin ere (2.000.000 euro), eraikuntza lanen lizitazioa laster aktibatuko da”. Euskara ere erronken artean: “Aurrekontuak igoera nabarmena izango du euskararen sustapenaren arloan, %22ko hazita horretara bideratutako diru zatia”.
