Gurasoak trebatzeko, bi saio Pasaian
Treba Gurasoak egitasmoaren baitan, udalak gurasoei begirako bi hitzaldi antolatu ditu datozen egunetan, Donibanen eta Trintxerpen.
Pasaiako Udala, Gipuzkoako Foru Aldundiarekin elkarlanean, urratsak egiten ari da Treba Gurasoak egitasmoan. Bide horretan, gurasoei begirako bi hitzaldi eskainiko ditu datozen egunetan. Udalaren arabera, saio horien helburua da gurasotasuna lantzea eta seme-alaben heziketan laguntzeko tresnak ematea. Sarrera doakoa da, baina aurrez izena eman beharko da.
Lehen saioa hilaren 11n izango da, Donibaneko Kulturguneko erabilera anitzeko gelan, 17:30ean, Arauak eta mugak: nola ezarri era asertibo batean izenpean. Izena helbide elektroniko bidez eman behar da, hilaren 9a baino lehen. Hitzaldi horren trebatzailea Leyre Cano psikopedagogoa izango da, eta helburuak dira familia giro ona izateko modua lantzea, familian arauak eta mugak izatearen beharra jakitea, familiako arauak era asertiboan jartzearen onurak ikustea eta familian arauak era asertiboan jartzeko tresnak ezagutzea.
Bigarren saioa, aldiz, hilaren 17an izango da, Trintxerpeko alkateordetzan, 17:30ean, Osasun mentala eta nerabeak izenpean. Bertaratzeko aurrez izena eman behar da helbide elektroniko bidez, hilaren 14a baino lehen. Estibaliz Ansotegi izango da trebatzailea, eta hainbat galdera erantzuten saiatuko da: Nola sentitzen dira gure seme-alabak? Zer da osasun mentala? Zerk kezkatzen gaitu osasun mentaletik? Zer dira gatazkak? Zein garrantzi du adimen emozionalak? Nola lagun diezaiekegu?
