Erraldoi eta buruhandiek Antxo hartuko dute larunbatean
San Tomas eguneko programazioaren barruan, erraldoien eta buruhandien topaketaren lehen ekitaldia egingo da, 12:30etik aurrera.
Antxoko San Tomas eguneko programazioaren barruan, erraldoien eta buruhandien topaketaren lehen ekitaldia egingo da larunbatean (hilaren 13an). Erraldoien Eguna – Erraldoi eta Buruhandien Topaketa 2025 izenpean, Pasaiako, Lezoko, Irurako, Agoizko eta Legazpiko konpartsak bilduko dira Antxon. 12:30ean ikusgai egongo dira Hamarretxeta kalean, eta 13:00etan, erraldoi eta buruhandi guztiak kalejira irtengo dira bertatik. Konpartsa horiek beren erraldoi eta buruhandiekin iritsiko dira Antxora, baita dultzaina eta gaitari taldeekin ere.
Pasaiako konpartsak herritar guztiak animatu ditu larunbateko topaketan parte hartzera. San Tomas eguna goratzeko ekintza mordoa prestatu dituzte barrutian, eta horietako bat da erraldoi eta buruhandiena. “2025ari bukaera bikaina eman nahi genion. Gainera, bihotzez eskerrak eman nahi dizkiegu Antxoko Jai Batzordeko kide guztiei hasieratik laguntzeagatik eta topaketa hau errealitate bihurtzeagatik Antxoko San Tomas bezalako egun berezi eta polit batean”, adierazi du Markel Oyarzabal Pasaiako konpartsako lehendakariak.
Eguraldiak laguntzen badu, “indar eta ilusio handiz” hartuko dituzte Antxoko kaleak; eguraldi txarrarekin, baina, topaketa Ibaiondo frontoira lekualdatuko luketela jakinarazi du Oyarzabalek, ordutegi berarekin. Horrez gain, lehendakariak baietsi du Pasaiako konpartsarentzat “mugarri garrantzitsua” dela larunbateko topaketa: “Pasaian zein kanpoan, Gipuzkoan, Bizkaian eta Nafarroan hainbat emanaldiz betetako urte baten ondoren, Euskal Herri osoan erraldoi eta buruhandien munduan erreferente gisa berretsi nahi dugu gure burua”. 2026rako, gainera, proiektu eta koreografia berriak prestatzen ari direla aurreratu du Oyarzabalek.
Pasaiako konpartsak Antxon izango diren konpartsen parte hartzea eskertu du, “beste herri batzuetan egiten diren euskal erraldoien topaketen tradizioa jarraitzen duen anaitasun keinu batean”. Pasaitarrak, esaterako, Villabonan egindako topaketa batean izan ziren urrian.
