Lezoko Eguberrietan, 30 ekitaldi inguru
Jai, kultur eta kirol giroko jarduerak izango dira herrian datozen asteetan. Ekitaldi klasikoak mantenduko dira, baina berriak ere badaude.
Saizar eta Salaberria, gaurko aurkezpenean.Lezoko Udala Gaur aurkeztu du Lezoko Udalak herriko eragileekin batera osatu duen Eguberrietako egitaraua. 30 ekitaldi inguruk argituko dute neguaren hasiera herrian, betiere urte zaharrari agur esateko eta berriari harrera egiteko testuinguruan. Festa, kultur, eta kirol kutsuko jarduerak dira. Aitzol Saizar Kultura zinegotziak eta Ainhoa Salaberria Kultura teknikariak eman dute gaur datozen egunetako ekitaldien berri. Aurreratu dute egitaraua etxez etxe banatuko dela. Jarduera asko Lezoko Eguberrietako klasikoak dira; baina bada berririk.
Aurkezpenean, hasteko eta behin nabarmendu dute hilaren 12tik 23rako tartean Euskal Liburu Azoka jasoko duela Kultura Aretoak; goizez eta arratsaldez izango da zabalik bitarte horretan (11:00-13:00, eta 17:00-19:00). Igandean (hilaren 14an) San Tomas Egunari lotutako jaia izango da goizez Karlos Saldisen, eta Gaintxurizketako Antxillastegin ere talo tailerra eta azoka izango direla jakinarazi dute.
Egitarauari errepasoa egiterakoan, Salaberriak aipatu du hilaren 24koa kalejiren eguna izango dela: 11:00etatik Piztu Lezoren janari bilketa solidarioa hasiko da; 12:00etan Euskal Herria plazatik, Hator, hator kantatzera jarduerari ekingo diote, 12:45ean Aitona-Amona Bordatik kantu jira berezia abiatuko da; eta 18:00etatik aurrera Lau Katu txarangak herriko kaleak alaituko ditu.
Urteko azken egunean, hilaren 31n, haurren lasterkaldiek girotuko dute herria umeen San Silbestre lasterketak egingo dituztelako 11:30etik, Gurutze Santuaren plazatik abiatuta; 12:45ean hasiko dira Urte Zaharreko koplekin.
Urtarrilaren 5ean, bi klasiko: Porrotx, Marimotots, Pupu eta Lore pailazoen emanaldia (12:00, Bekoerrotan), eta Erregeen desfilea (19:00, Lopenetik).
Berritasunen arteam, bat nabarmena: udalak eta Lezokoak Merkatari, Ostalari eta Zerbitzu Elkarteak bi bakarrizketa saio antolatu dituzte hilaren 19rako eta 2026ko urtarrilaren 2rako.
Saizar zinegotziak jarduera horietan parte hartzeko gonbita luzatu die lezoarrei, nabarmenduz horiek lezoar orori begirakoak direla, “belaunaldi ezberdinak elkartzen dituzten topaguneak izaten dira, eta herriarentzat oso aberasgarria da hori”.
Hemen sakatuta, egitarau oso-osoa ikusteko aukera (PDF artxiboa zabalduko da).
