Hurrengo geltokia: egia, justizia eta erreparazioa
'Mikel Zabalza gogoan, 40 urte' herri iniziatiba ibiltaria Errenteria-Oreretan da gaur. Galtzarabordan omenaldia izan da, eta ondoren Zumardian herri harrera.
Galtzarabordatik Zumardira martxa egin dute. Mikel Zabalza gogoan, 40 urte herri iniziatiba Errenteria-Oreretan da gaur. Egitasmo ibiltariaren ikurra autobus publiko bat da, hain zuzen, Guardia Zibilaren torturengatik hil zen Mikel Zabalza 1985eko azaroan nafarra Donostiako autobus publikoetako langilea zelako, gidaria. Lau gurpildun ikur horren barruan Zabalza oroitarazteko, nor zen azaltzeko, eta torturaren basakeriak hil zuela jabetzeko erakusketa dago jarria. Albo batean Egia, justizia eta erreparazioa leloa du itsatsia, handi-handi, busak. “Horrek izan behar du Zabalzaren kasuaren, eta torturatu nahiz errepresaliatu guztien hurrengo geltokia”, esan dute egitasmoaren gidariek.
Torturaren basakeria, Zabalzaren bidaia ilunari argia eman nahi diote iniziatibaren bidez, memoria egiteko. Hori horrela, Euskal Herrian barrena dabil autobus ibiltaria. Nafarroako Torturatuen Sareak bultzatutako ekinaldia da Zabalzaren omenezko autobus ibiltaria. Nafarroako Gobernuak eta Eusko Jaurlaritzak estatuko indarkeriaren biktima gisa aitortua dute nafarra, baina ez da oraindik egi osoa ezagutzen, haren espedientea sekretu ofizialen legearen pean dago eta. Espainiako Gorteek aldatu behar dute lege hori sekretupekoa izateari utz diezaion.
Eguerdian omenaldia egin diete Galtzarabordako Ion Arretxe parkean Zabalzari, Ion Arretxeri eta Idoia Aierberi. Operazio polizial berberean atxilotu zituzten hiruak, ETAko kide izatea egotzita. Haiek ere basakeriz izan ziren torturatuak. Arretxe oreretarra 2017ko martxoan hil zen; Aierbe, Zabalzaren bikotekide zena, 2018ko abenduan zendu zen. Intxaurrondoko kuartelean inkomunikatuta izan zen aroa eta horrorea Intxaurrondo: la sombra del nogal liburuan kontatu zuen kulturaren eta sormenaren alor asko eta askotan ibili zen Arretxek. Omenaldi xumea izan da Galtzarabordako parkekoa. Omenduen senideek parte hartu dute, dozenaka herritarrekin batera.
Goialdeko auzotik herriaren erdira jaitsi da Mikel Zabalza gogoan, 40 urte iniziatibaren segizioa. Herriak harrera egin dio autobusari Gamon Zumardian, kantu jirako kideen laguntzarekin. Gaur arratsaldean autobusaren barrenak eta bertako mezu nahiz datuak ikusteko aukera izanen dute hala nahi dutenek. Memoriarako gunea da ibilgailua, efimeroa ordea. Izan ere, bihar (hilak 14, igandea) bukatuko da autobus ibiltariaren bira. Donostiako Ategorrietan DBuseko langileekin bat egingo dute 11:45ean, eta zutabean Bulebarreraino joango dira. Bertan izango da ekitaldi nagusia, 12:30ean.
Ondoko bideo eta argazkietan, egitasmoak herrian egin duen bidearen hainbat pasarte.
