Barandiaran parkeko obren bigarren fasea, martxan
Gaur bertan sinatu dute obren hasiera, eta aste honetan bertan hasiko dituzte aurretiko lanak. Hamalau hilabeteko iraupena aurreikusi dute.
Barandiaran parkeko bigarren faseko lanak hasiko dituzte. Aste honetan zehar hasiko dituzte Barandiaran parkearen obren bigarren faseko aurretiko lanak. Hala jakinarazi du udalak, eta azaldu, gaur bertan sinatu duela obra hasiera. Hori horrela, datozen egunetan obrarako instalazio osagarriak jarriko dituzte, languneetarako sarbideak prestatu, eta materialak biltzeko eta hondakinak kudeatzeko gunea prestatuko dituzte, besteak beste.
Hamalau hilabeteko iraupena izango dute bigarren faseko obraren lanek, eta 2.159.075,72 euroko aurrekontua.
Aurretik, 2022 eta 2023 artean egindako lanak, hala nola, orubean identifikatutako kutsatzaile esanguratsuenak (hidrokarburoak, PCBak, disolbatzaileak) tratatzea eta kudeatzea, 40.000 litroko fuel olio biltegi bat kentzea, eta deskontaminazioa modu eraginkorrean gertatu zela egiaztatzeko ebaluazioa eta jarraipena, funtsezkoak izan ziren obrak egitea ahalbidetu zuten baimenak eta ziurtagiriak lortzea arintzeko. Obraren lehen fasea 2024ko irailean hasi zen, eta parkea zehazteko eta errekaren ibilgua berreskuratzeko beharrezko lur mugimenduak egin ziren. Une berean, lurzoruen deskontaminazioaren jarraipena egiten jarraitu zen, Eusko Jaurlaritzako Ingurumen Sailak baimenean ezarritako jarraibideen arabera. Halaber, URA Agentziarekin ingurumen irizpideak eta parametro hidraulikoak landu zirela azaldu du udalak, parkea egituratzen duen Pekin errekastoaren ibilgua urez hornitzeko. Lehenengo fasearen kostua 1.595.436,46 eurokoa izan zen.
Agintaldiaren proiektu estrategikoa
Parkearen eraikuntza da 2023-2027 Agintaldi Planean jasotzen den proiektu garrantzitsuenetako bat. Tamaina handiko proiektu konplexua da —12.650 metro koadro—, eta ahalegin handia egin behar izan dela hura gauzatzeko adierazi du udalak, “batez ere lurzoruak deskontaminatzeko, baina baita Pekin erreka azaleratzeko ere. Azken horretarako beharrezkoa izan da koordinazio estua URA Agentziarekin eta Eusko Jaurlaritzako Industria, Trantsizio Energetiko eta Jasangarritasun Sailarekin, lanak behar bezala garatzeko”.
Lan horiekin udalerriak espazio bizigarri garrantzitsu bat irabaziko duela gaineratu du udalak, “besteak beste, jolas jardueretarako eta aisialdirako, auzotarren eskaera historikoa izan dena errealitate bihurtuta”.
