Gabonekin "murrizketak" heldu direla lehen arretara salatu dute
Ordutegiak murriztu, lan karga areagotu, eta itxaron zerrendak handituko direla diote Osasun Publikoaren Aldeko Herri Plataformek.
Murrizketak salatu zituen plataformak Iztietako anbulatorioaren aurrean.Osasun Publikoaren Aldeko Plataforma Kexu dira, baina batez ere kezkatuta. Gabonekin batera lehen mailako arretan berriz ere murrizketak helduko baitira. Hala jakinarazi du Osasun Publikoaren Aldeko Herri Plataformak, eta murrizketa horiek Errenteria-Oreretako bi anbulatorioei, Iztieta eta Beraungoari, ere eragingo dietela.
Gogor salatu dute Osasun sailburuak “berrantolaketa” definitu duenaren atzean “murrizketak” daudela, azken urteetan gertatu den bezala.
Hori horrela osasun zentro gehienetan ordutegiak murriztu egingo dituzte, “hainbat egunetan itxi ere egingo dituzte batzuk, baita jai guztietan ere. Medikurik gabeko eta EAG Etengabeko arreta Guneak medikurik gabe arituko dira, gainera”.
Langile faltak, batez ere familia medikuntza eta pediatrian, lan gainkarga eragiten diela profesionalei ere jarri dute nabarmen eta horrek arreta denborak laburtzen dituela, “prebentzio eta osasun komunitario lana mugatuz”. Itxaron zerrendei ere erreparatu diete, horiek ugarituko diren zalantzarik ez dute, “ospitaleko larrialdiak beteko dira eta arretaren kalitatea murriztuko dute”.
Murrizketa horiek ez direla “puntualak” salatu du plataformak, “egiturazkoak dira, urtean bost aldiz gertatzen baitira, eta lehen mailako arreta eta osasuna ahultzen dituzte. Ezin dugu ahaztu klinika eta seguru pribatuei mesede egiten dietela”. Argi esan dute ezin dela “normalizatu” arlo publikoaren “narriadura planifikatua” eta eskaera zehatza egin, ” lehen mailako arretarentzat beharrezko baliabide humano eta ekonomikoak bermatu behar dira, urte osoan zerbitzua eskaini ahal izan dezan, eta kalitatezko osasun arta jaso dezagun”.
Herritarrak osasun publikoa defendatzera deitu dituzte, “osasuna jokoan dugu eta”.
