Portuaren jardunagatik zerga konpentsazio berezia eskatu dute alkateek
Errenteriako, Pasaiako eta Lezoko alkateek agerraldia egin zuten atzo Gipuzkoako Batzar Nagusietako Ogasun eta Finantza Batzordean.
Hiru alkateak, atzo, aldundiko Ogasun batzordean. Errenteriako, Pasaiako eta Lezoko alkateek agerraldia egin zuten atzo Gipuzkoako Batzar Nagusietako Ogasun eta Finantza Batzordean. Aizpea Otaegik, Teo Alberrok eta Mikel Arrutik eskatu zuten Pasaiako Portuaren jardunagatik zerga konpentsazio berezia eman behar zaiela azpiegituraren inguruan diren udalerriei, jardun horrek eragina duelako herrietan, neurri fiskal eta ekonomiko zehatz bidez konpentsazioa behar delako. EAJren bozeramaileak erantzun zien jada zerga berezi horren tramitazioa martxan dela, eta 2027ko urtarriletik aurrera badiaren inguruko udalerriak konpentsazio fiskal hori jasotzen hasiko direla. Alkateek baikor baloratu zuten EAJko kideak esandakoa.
Alkateek egindako eskaera ez da ausazkoa izan. “Izan ere, BICE/EBOHZ (Ezaugarri Berezietako Ondasun Higiezinen Zerga) izan zuten hizpide. Zerga horrek, Espainiako Estatuko araudian jasota dagoenak, udalerrietan kokatutako ezaugarri bereziko azpiegiturek —hala nola, portuek— sortzen dituzten ondorioengatik tokiko administrazioei konpentsazio fiskala ematea du helburu, Ondasun Higiezinen Zergaren bidez. Nafarroan, Bizkaian eta Araban jada aplikatzen da, eta baita Espainiar Estatuan ere, baina Gipuzkoan oraindik ez dago indarrean”, azaldu dute hiru udaletatik.
Atzoko agerraldiaren aurretik gaiaren gaineko lanketa egina zuten udalek eta aldundiak. 2025ko maiatzean bildu ziren udal agintariak aldundiko Ogasun diputatuarekin eta hilabete geroago Eider Mendoza ahaldun nagusiarekin. Orduko haietan aldundiko arduradunek alkateei adierazi zieten gaia lantzen ari zirela. “Ordutik Aldundiak izandako denbora gorabehera, aldaketa ez da 2026ko aurrekontuetan jaso, eta ondorioz, datorren urtean ere ez da zerga hau aplikatuko”, mintzatu zen Errenteriako alkatea. “Beraz, nahi genukeena baino beranduago, baina positiboki baloratzen dugu azkenean bidea ireki izana. 2027an aplikatzea albiste ona da, baina ezin dugu ahaztu 2026an ere udalok gure herriek dituzten gabeziei aurre egiteko baliabide gutxiagorekin jarraituko dugula”.
Afekzioak
Zerga bereziaren tramitazioa argudiatzeko, portuaren jardunak egunerokoan badia inguruko udalerrietan duen eraginaz mintzo zen Mikel Arruti alkatea aldundiko batzarrean: trafiko astuna, zarata, kutsadura eta mugikortasun trabak, besteak beste, aipatu zituen. “Badia inguruko bizilagunek egunero bizi dituzte portuaren ondorioak. Ez dira salbuespenak, eguneroko errealitatea baizik, eta ezin zaie horiei ezikusiarena egin”, adierazi zuen Arrutik: “Portua udalerrien gainetik dagoen azpiegitura da, baina haren ondorioak tokian tokiko bizilagunek pairatzen dituzte, eta horrek konpentsazio mekanismo justuak eskatzen ditu”.
Atzo entzundakoekin ados izanda ere, harago joateko eskatu zuen Teo Alberro Pasaiako alkateak. “Kasurik onenean 2027an aplikatuko den BICEa beharrezkoa bada ere, ez da nahikoa, eta badiako herriek funts ekonomiko berezi eta egonkor bat behar dute”. Gogorarazi zuen Pasaiako badia degradatutako eremu gisa aitortua dagoela, eta horrek administrazio guztien erantzukizuna dakarrela. Alberrok nabarmendu zuen Jaurlaritzaren eta aldundiaren inplikazioa izan beharko lukeela horrek guztiak, “eta udalerriei finantziazio egonkorra eta planifikagarria eskaini, badiaren biziberritzea benetan gauzatu ahal izateko. BICEak konpentsazio fiskala ekarriko du, baina aitortutako egoera bati erantzuteko, tresna ekonomiko propio eta iraunkorrak behar ditugu”.
