Txerri Eguna, giro ederrean
Jendez lepo egon dira Madalensoro Pilotalekua, Beheko Plaza eta Elizaldeko frontoia.
Giro bikaina nagusi beste behin Oiartzungo Txerri Egunean. Madalensoro Pilotalekua, Beheko Plaza eta Elizalde Ikastetxeko frontoia jendez beteta egon dira gaurkoan. Baserritar jantziak ipini, eta egunaz gozatzen ibili dira gazte zein heldu.
Txistorra gaurko protagonista nagusietakoa izan bada ere, ez da bakarra izan. 10:00etan hasi da festa, artisau eta ganadu feriak hasi direnean. Tartean, baina, 11:15ean herriko ikastetxeetako ikasleek dantza emanaldia eskaini dute, Olarri dantza taldearen txanda izan da jarraian.
Ateak zabaldu dituenetik, Madalensoroko azoka lepo egon da, herriko artisauen postuetatik ere zientoka lagun pasatu dira, Eguberrietako opariak erosteko egun aproposa baita gaurkoa. Eta kanpoko zein Elizaldeko txosnetako boluntarioak ere buru altxa ezin ibili dira, txistorra eta sagardo botilak barra-barra izan dira, eta izango dira. Luze joko baitu gaurko Txerri Egunak.
Hona hemen eguerdian HITZAk ateratako argazkiak:
