Euskaraz barra-barra zigiluak, saria dakar
Zigilua duten establezimenduetan erosketa eginda, zozketan parte hartuko dute bezeroek.
Korrikarekin bat eginda, euskararen erabileraren aldeko beste keinu bat egingo du Errenteria-Oreretako merkataritzak eta ostalaritzak. Merkataritzan eta ostalaritzan ere ari gara. Korrika gara. Euskara gara lelopean egingo dute kanpaina hilaren 23an hasi eta martxoaren 9ra arte. Kanpainarekin bat egiten duten establezimenduek, Euskaraz barra barra zigilua izan beharko dute, eta horietan erosketa egiten duten herritarrek, zozketa batean hartuko dute parte.
Saria, oso berezia, 24 Korrikan lekuko hartzaileetako bat izatea, parte hartu duen establezimenduarekin batera.
Barra-barra zigilua lortzeko baldintzen inguruko informazio guztia udalaren webgunean kontsulta daiteke (klik hemen). Bertan izango da, halaber, zigilua duten establezimenduen zerrenda.
Herritarrek euskaraz hitz egin dezaketen espazioak identifikatzen dituen ikurra da Euskaraz barra-barra zigilua. Kontsumitzailea erdigunean jarri eta estres linguistikoa murriztea du helburu, baina ez hori bakarrik. Euskararen erabilera sustatzea merkataritza eta ostalaritzan eraginda, herritarren hizkuntz eskubideak errespetatu eta bermatzea, eta euskararen biziberritzearen inguruan kontzientziazioa eta konpromisoak sustatzea ere bilatzen du.
Kanpainan izena emateko azken eguna hilaren 13a izango dute establezimenduek.
