Jarduerez betetako hilabetea Emakumeen Etxean
Zineforuma, kafe solasaldia, SOS Arrazakeriaren urteko memoria aurkezpena, eta Emakumeen Etxeko urteko batzarra egingo dituzte.
Emakumeen Etxean ate irekien jardunaldia egin zuteneko irudia. Egitaraua lepo dator hilabete honetan Emakumeen Etxetik. Izan ere, lau jarduera ondu dituzte, askotarikoak oraingoan ere. Lehenengoa, zineforuma izango da, hilaren 12an, eta Diamante en bruto filma aukeratu dute horretarako. 18:00etan izango da, sarrera doan eta libre da aretoa bete arte, eta filma behin ikusita solasaldirako tartea hartuko dute.
Frantzian egindako pelikula Cannesen aurkeztu zuten. Edertasunarekin itsututa dago protagonista, norbait izatearekin tematuta, eta realityetan ikusten du maitatua izateko aukera.
Bigarren jardunaldia, kafe solasaldia. Gaia berriz, ikasketen homologazioa izango da. Hilaren 18an izango da, asteazkenarekin, 16:00etatik 18:00etara, Emakumeen Etxean. Bereziki emakume migratuei begira antolatutakoa da jarduera hori eta bertan, Bidez Bide elkarteko Katia Reimbergek prestakuntza eta errotze prozesuei laguntzeko funtsezko informazioa, esperientziak eta baliabideak partekatuko ditu. Halaber, Emakumeen Etxean hilean behin eskaintzen duen parekatu ikasketa eta prestakuntza ibilbideen homologaziorako aholkularitza zerbitzuaz hitz egingo du.
Hilaren 19an urteko batzar nagusia egingo du Emakumeen Etxeak, eta parte hartzera deitu ditu datozen hilabeteetarako plangintza eta antolaketa ezagutzera hurbildu nahi duten etxekide guztiak.
Hileko laugarren eta azken jarduera, hilaren 26an izango da 18:00etan hasita. Horren barruan SOS Arrazakeria elkarteak etxeko langileentzako lan aholkularitzaren jardueraren iazko memoria aurkeztuko du. Sarrera doan eta librea, aretoa bete arte.
Informazio gehiago nahi izanez gero Emakumeen Etxean bertan (Txirrita Parkea, z.g), emailez (klik hemen) idatziz edo telefonoz (943 449 630) jasotzeko aukera egongo da, astelehen eta ostiraletan 9:00etatik 13:00etara eta astearte, asteazken eta ostegunetan 16:00etatik 20:00etara.
