Lezoko Udala, Gi-636 errepideaz: "Errealitatea aztertu eta aldaketak egin behar dira"
Behin betiko pasabidea egiteko lehen urratsa baikor baloratu du udalak, baina errepideak trafiko handiegia duela uste du.
2025eko ekainetik da zabalik behin-behineko pasabidea.Lezoko Udala Joan den astearen bukaeran iragarri zuen Gipuzkoako Foru Aldundiak Gi-636 errepidea Gaintxurizketa auzotik pasatzen den horretan, behin betiko pasabidea egiteko lehen urratsa egingo dela. Pasabide hori eraikitzeko proiektuaren idazketa lizitaziora ateratzea onartu dela, alegia. Horren oinarrizko aurrekontua 52.000 eurokoa da, eta aldundiak, Lezoko Udalak eta Eusko Trenbide Sareak (topoko geltokiaren gainetik ere pasako da zubia) finantzatuko dute, bakoitzaren diru ekarpena berbera izango delarik. Hori baikor baloratu du Lezoko Udalak, behin-behinekoa den pasabidea (2025eko ekainetik da zabalik), iraunkor batek ordezkatuko baitu. Baina errepidearen trafikoaren gaineko gogoeta ere egin du udal erakundeak: “Hobekuntzak egiteko lanean jarraitzeaz gain, oinarrian dagoen errealitatea aztertu eta aldaketak egin behar dira. Errepidearen ondorioak arintzeaz gain, ondorio horien kausak gutxitzeko hobekuntzak egin behar dira”.
Pasabideak, egungo behin-behinekoak zein aurrerago egingo den betikoak, Gaintxurizketako bizilagunen nahiz inguruko enpresetan lan egiten dutenen segurtasunean, irisgarritasunean eta auzoko mugikortasunean eragingo duela azaldu du udalak. Behin-behineko hori zabaltzerako, Perrene auzorako eta 107 industrialderako bideak eginak zituela zehaztu du udalak. “Pasabidea oinezkoen segurtasuna modu errealean babesten eta hobetzen duen irtenbidea izan da, eta behin betiko azpiegitura eraikitzeko lehen prozedurak abian jartzea oso positiboa da”.
Baina pasabidea izanda ere, Gi-636ko trafikoa “handiegia” dela iritzi du udalak: “Ibilgailu asko ibiltzen dira, eta kamioi eta trailerren trafiko handiegia du. Gaintxurizketatik bideratzen dira horien guztien ibilbideak, eta horrek zuzenean eragiten du zirkulazioan, baina are gehiago bertako bizilagunen eta langileen egunerokoan”. Horregatik adierazi du udal erakundeak egokia dela pasabidea egitea, baina trafikoaren arazoak berean jarrai dezakeela uste du, nahiz eta pasabideaz aparteko bestelako zirkulazio neurriak hartu.
Udalak nabarmendu du Gi-636ren arriskuak agerian uzteko auzoko bizilagunen eta han lan egiten dutenen aldarriak ezinbestekoak izan zirela. Gainera, erakundeen arteko elkarlanean eta koordinazioan jarraitzeko prestutasuna azaldu du Mikel Arruti alkateak.
