Astelehenean zabalduko dute Arramendipeko taberna
COVID-19aren eraginagatik itxi zen Pontikako erretiratuen elkartearen taberna. Horrela, erretiratuen elkarte guztietako tabernak izango dira martxan.
Arramendipe elkarteko arduradunak, eta taberna ustiatuko dutenak.Errenteriako Udala Astelehenean zabalduko dute berriz ere Pontikako Arramendipe erretiratuen elkartearen egoitzako taberna. COVID-19aren garaian itxi zen, eta hainbat alditan lizitazioara atera ondoren, azkenean zerbitzua esleitu du Errenteriako Udalak. Horrela, udalerriko erretiratuen elkarte guztietako tabernak izango dira zabalik: herriko elkarte horiek osotara 3.000 bazkide baino gehiago dituzte.
Astelehenetik ostiralera goiz eta arratsaldez, eta larunbat goizez izango da zabalik Arramendipeko taberna. “Ilusio handiz hartu dute albistea erabiltzaileek. Kafetegi zerbitzua eskainiko dute, baita pintxoak eta errazioak ere”, zehaztu du udalak. Hala, udalaren arabera, taberna-jatetxe zerbitzua eskaintzeko instalazioak dituzten klubetan, instalazio horiek eragin biderkatzailea dute zentro horiek dinamizatzeko eta horiei bizia emateko orduan. “Ondorioz, zerbitzu horiek kudeatzen dituzten ostalariek zerbitzu horiek ixteak erretiratuen elkarteen jarduera jaistea ekarri ohi du”.
Udalak nabarmendu du erretiratuen etxeetan egiten dituzten jarduerei esker, bazkideen kopurutik harago iristen direla. “Kopuru horrek ematen du zentro horiek adineko pertsonak aktibatzeko eta dinamizatzeko duten garrantziaren dimentsioa. Hori gutxi balitz, klub horiek oso garrantzitsuak bilakatu dira nahi ez den bakardadearen prebentziorako eta horri aurre egiteko”.
