Trastamintxo agertu da Trapujale Festan

Pasaia-Lezo Lizeoak Trapujale Festa egin du Karlos Saldiseko aterpean. LHko ehunka Trapujalek parte hartu dute.

2026/02/13

Makur altxa da gaur Pasaia-Lezo Lizeoa. Trastamintxok, intentzio oso txarrez, hankaz gora jarri ditu ikastolaren egoitza guztietako gelak. Gaiztoa baita. Tira, gaiztoa ez, bihurria.

Gure mutiko bihurritxoak

Trastamintxo du izena,

denbora luzez trastakeriak

egiten aritzen dena;

bera da haurrak dibertitzeko

mundu honetan onena,

inauteritan etortzen zaigu

urtero beti honera.

Bere lastozko kapel hautsia

darama buru gainean,

galtz zulatuak jantzirik ditu

petatxoa ipurdian;

ator gorri bat ere badauka

zuloz beterik soinean,

bere jakirik gogokoena

mukiak saltsa berdean.

Trastamintxok, bihurrikeriak egin ondotik, Lezoko Karlos Saldise plazan egin du agerraldia. Lasaiago zegoen. Izan ere, Argitxorekin batera Trapujale Festa aurkeztu du. Hasierako intentzioa zen Gurutze Santuaren plazan egitea festa, baina Trastamintxok harekin euria ekarri du. Erabaki dute aterpean egitea ehunka LHko ikasle, eta beste hainbeste guraso, aiton-amon eta senide bildu dituen ekitaldia. Komeriak izan dituzte askok, ordea, nahi zuten umea ezagutu eta beharrezko argazkia ateratzeko: denak Trapujalez jantzita irten dira euren euskal dantzen emanaldietara. Tira, denak Trapujalez ez: Marinazkane eta Zirikuak han ziren, serio asko, den-dena ikuskatzen; planen bat dute buruan. Plan traketsa ziurrenik.

Gaur Ostiralori da. Lezoko inauterien bigarren eguna, Atzo iritsi zen Trapujale; gaur eta bihar, nahiz astelehenean eta asteartean badira ekitaldi askoz gehiago. Beheko zerrendan ikus daitezke.

Jarraian, Saldisen bizi izan den giroaren hainbat irudi eta bideoa.

2026ko Lezoko inauteriak. Egitaraua.

Otsailak 13, Ostiralori.

17:30. Gurutze Santuaren plazan, Sorgin dantza eta Zirikuen kalejira.
18:15. Lezoko Dantzazaleen desfilea.
19:20. Gurutze Santuaren plazan, Lezoko Dantzazaleen eskutik Zuberoako dantzak.
21:30. Pasaia-Lezo Lizeoko jangelan, Trapudrama bertso afari tematikoa. Bertsolariak: Maddi Ane Txoperena, Igor Elortza, Maider arregi eta Andoni Rekondo. Trapujalez edo haren inguruko pertsonaiaren batez mozorrotu behar da. Txartelak Arrutin eta Tiñelun salgai.

Otsailak 14, Larunbatgorri.

11:30. Kale Nagusiko Murixka Dantza Taldearen egoitzatik abiatuta, Euskal Herriko hainbat inauteritako dantzekin kalejira Murixkaren eskutik. Gurutze Santuaren plazan bukatuko dute bidea.
17:00. San Pedro auzotik, herri desfilea Jaixkipe txarangak girotua. Gaia: Kirola.
19:00. Karlos Saldise plazatik abiatuta, karro-poteoa. Jarraian, mozorro festaren aurkezpena eta talde argazkia Gurutze Santuaren plazan.
21:00. Koldobike Gezala pilotalekuan, mozorroen herri afaria, eta sarien banaketa. Gaia: Kirola.
23:30. Koldobike Gezala pilotalekutik abiatuta, Poteo txarangarekin kalejira.

Otsailak 16, Astelehenarre.

17:30. Gurutze Santuaren plazan, Lezoaundi Erraldoi eta Buruhandien Konpartsaren aurkezpena. Ondoren, kalejira.

Otsailak 17, Asteartebeltz.

15:00. Lezo Herri Eskolan, Trapujaleren Epaiketa Txikia. Ondoren, txokolatada.
19:00. Gurutze Santuaren plazan, Trapujaleren Epaiketa eta ondoren Herio Bidaia.

Erlazionatutako edukiaLagun asko ditu Trapujalek

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.