Lezoaundi aurkeztuta, gaur, Asteartebeltz
Atzokoa, Astelehenarre, Lezoaundi herriko buruhandi eta erraldoien konpartsa aurkezteko eguna izan zen. Gaur epaituko dute Trapujale.
Konpartsakideak, atzoko aurkezpenean. Agian nahi bezala ez, baina Lezoaundi Lezoko Erraldoi eta Buruhandien Konpartsak zer den eta zer egin nahi duten aurkeztu zuen atzokoan herritarren aurrean. Haien asmoa zen inauterietako astelehenean, Astelehenarren, Gurutze Santuaren plazatik hasi eta herriari bira ematea. Eguraldiak ez zuen lagundu, eta Lezo Herri Eskolako jolastoki estalian egin zuten agerraldia. Ondare baliotsu eta sentiberak baitira Zabarre eta Oroitzene erraldoiak; haiekin batera izan ziren Kaxkagogor, Joanes, Eneko eta Belarrimotz buruhandiak, eta Doinubeltz taldeko gaiteroak. Aurkezpenerako bereziki prestatutako dantzak egin zituzten han bildu ziren haur nahiz helduen aurrean.
Gazte-gazteak dira Lezoaundikoak. Txikitan, herriko erraldoien atzetik begiak zabal-zabal ibiltzen ziren horietakoak. Erraldoi txikiak egin eta kaleratzen zituztenetakoak. Alta, azken urteetan herriko erraldoiak ez zituzten lezoarrek dantzatzen, eta konpartsaren sortzaileek beste herritakoekin eskarmentua zutenez, erabaki zuten herrikoa sortzea. Esan eta egin. Atzokoa etorkizunean normala izango den jarduera baten lehena izan zen: lezoarrak, Lezoko erraldoiak dantzatzen. Ilusioz ekin diote bideari, Lezoko hainbat eragileren laguntzarekin. HITZAk atzokoaren aurretik erreportajea egin zuen Lezoaundikoekin. Esteka hau baliatu haiek esandakoak irakurtzeko.
Gaur izango dute Lezoko inauteriek azken eguna, Asteartebeltz. 15:00etan, Lezo Herri Eskolan Trapujaleri Epaiketa Txikia egingo diote. 19:00etan, berriz, epaiketa nagusia Gurutze Santuaren plazan. Azken orduak ditu Trapujalek herrian.
Jarraian, Lezoaundiren aurkezpeneko bideoa eta irudiak.
