Mobilizazioak hasiko dituzte La Anunciatako langileek
Ikasturte bukaeran itxiko dutela adierazi dute ikastetxearen arduradunek. "Aldebakarreko erabaki horrek 30 langile ingururen lanpostuak kolokan jarri ditu".
La Anunciatako langileei Antxo sarreran jarritako pankarta. Urtarrilaren 29an La Anunciata Antxo eta Donostia artean den ikastetxea itxiko zuela iragarri zuen haren titularra den Francisco Coll fundazioak. Ixtearen arrazoiak, bi nagusiki: ikasle falta, eta hezkuntza zentroaren eraikinek behar duten eraberritze lanei ezin aurre egitea. “Aldebakarreko erabaki horrek 30 langile ingururen lanpostuak kolokan jarri ditu”, adierazi dute La Anuciatako langileek publiko egin duten oharrean. Horregatik, mobilizazioak egingo dituzte. Lehena gaur (hilak 19, osteguna) izango da, 16:45ean manifestazioa egingo dutelako ikastetxearen sarreratik hasi eta Antxotik zehar. Hilaren 24 eta 26 artean hiru greba egun iragarri dituzte. “Gure lanpostu eta lan baldintzak defendatu eta ikastetxearen itxiera” salatu nahi dituzte. ELA sindikatuaren laguntza dute abiatuko duten borroka arorako.
Lanpostuak kolokan jartzeaz gainera, langileek zehaztu dute itxieraren erabakiak dozenaka ikasle eta familia ere kaltetuko dituela, “egun batetik bestera, haur eta gazteen ikasketa prozesua ikastetxean jarraitzeko aukera zapuztu baitzaie”, adierazi dute langileek. Are gehiago: langileek nabarmendu dute urtarrilaren 29ko jakinarazpenaren aurretik ez zutela inolako informaziorik edo argibiderik jaso, eta langileen ordezkariekin ere ez zela inolako hartu-emanik izan. “Gainera, ikasturte honen bukaeran ikastetxea ixteko erabakia matrikulazio epearen aurretik hartu da. Hurrengo urtean ikaslerik ez izateko erabakia enpresak berak hartu du, hortaz”.
Langileek uste dute kaleratze kolektibo prozesua datozen egunetan hasiko dela, eta ikasturte bukaerarako langile oro izango dela kanporatua. “Egoera horren aurrean gure desadostasun eta ezinegona azaleratu nahi ditugu”. Hori jendartera zabaltzeko eta ikastetxea ez ixtea eskatzeko abiatuko dute mobilizazio aroa: “Une gogor hauetan ikastetxeko komunitatearen eta herrikideen elkartasuna eta bultzada beharko ditugu. Hortaz, hurrengo egunetarako antolatutakoetan parte hartzera animatzen zaituztegu”.
Gurasoen elkartearen babesa
La Anunciata Ikastetxeko Gurasoen Elkarteak (IGE) elkartasun eta babes osoa adierazi die langileei hasiko duten borroka aroaren harira. Euren egoeraren gaineko kezka ere azaldu dute gurasoek: “Familiok ere erabaki honen ondorio zuzena jasango dugu, gure seme-alaben egonkortasunean eta hezkuntza proiektuaren jarraipenean eragin zuzena duelako”. Langileen mobilizazioetan parte hartzera deitu dute herritar oro: “La Anunciata defendatzea, bertako langileak eta gure seme-alabak defendatzea da”.
