Curlinga eguzki azpian ere jokatu daitekeelako
Olinpiar Jokoak izan dira aurtengo Trintxerpeko inauterietako gaia. Poteoa egin dute eguerdian, Sastakai txarangarekin, eta denetariko mozorroak ikusi dira.
Trintxerpeko bizilagunek zortea izan dute. Eguzkia atera da haien inauteri egunean. Pasaden astean euria izan ondoren egun ederra izan dute pasaitarrek. Atzo eskolako txikien txanda izan zen, eta haien mozorro onenak erakutsi zituzten. Gaur, aldiz, etxeko handienek ere disfrutatzeko momentua izan dute.
12:30ean abiatu dute eguna, Sastakai txarangarekin batera, poteatzen. Aurtengo gaia Olinpiar Jokoak dira, eta beraz, mozorro asko horren ingurukoak izan dira. Kuadrila bakoitzak gai bat hartu du. Epaile olinpikoak hortikan zebiltzan, eta curling talde bat irudikatu dute beste batzuek. Baziren ere parrila olinpikoa egin dutenak, haragi, arrain eta barazkiekin. Noski, sukaldari olinpikoaren eskuetan.
Serafin Esnaola plazatik atera dira, eta txarangari jarraituz hainbat txoko eta taberna bisitatu dituzte.
Gaur, parranda
Halere, badira ere gai orokorra alde batera utzi eta haien mozorroa egitea erabakitzen dutenak. Gaur desfilea izango dute 17:00etan, eta ondoren, Matraka elektrotxarangak girotuko ditu kaleak, 18:00etatik aurrera. Gauean ere parranda giroan ospatuko dituzte inauteriak.
Hona hemen HITZAk ateratako argazkiak:
