Aldundiak portuaren zerga berezia aktibatuko du
Errenteriako, Lezoko eta Pasaiako Udalek "positiboki" baloratu dute Ezaugarri Bereziko Ondasun Higiezinen figura arautzeko proposamena.
Errenteriako, Lezoko eta Pasaiako alkateek, Aizpea Otaegik, Mikel Arrutik eta Teo Alberrok hurrenez hurren, “positiboki” baloratu dute Gipuzkoako Foru Aldundiak beren udalerri eremuetan kokatuta dagoen Pasaiako portuak BICE zerga (OHZ berezia) izan dezan konpentsazio berezia arautzeko prozesua martxan jarri izana.
Hiru alkateek abenduaren 17an eskatu zioten aldundiari neurri fiskal hori “lehenbailehen” aktiba zezan, “portuak inguruko herrietan dituen gizarte, hirigintza eta ingurumen eraginak arindu eta eragin ekonomikoak indartzeko ezinbesteko tresna gisa”.
Neurri fiskal hori OHZren foru araudi berrian txertatzeko tramitazioa martxan dagoela jakinarazi dute hiru udalek. Zehazki, portua “Ezaugarri Bereziko Ondasun Higiezin (BICE)” gisa sailkatzea ahalbidetuko du aldaketa horrek. Aurrerantzean, hortaz, portuak tratamendu fiskal berezia izango du, eta, ondorioz, orain arte jaso ez dituzten zerga bidezko diru sarrerak jasoko dituzte Pasaialdeko udalek.
Arau proposamen berriari alegazioak aurkezteko epea hilaren 27ra arte egongo da zabalik, eta aurreikusita dago araudia ekainean onartuko dela behin betiko. Egutegi fiskala betez, helburua da zerga konpentsazio berezi 2027ko urtarriletik aurrera aplikatu ahal izatea Errenteriako, Lezoko eta Pasaiako Udaletan.
Aldundiak hiru alkateen eskaera “bere egin izana” positiboki positiboki baloratu dute: “Urrats garrantzitsua da hau, bidezkoa badiako bizilagunentzat. Azken hilabeteetako lan, bilera eta interbentzioen ondoren, pozgarria da egitasmoa martxan jarri dela ikustea eta, dena ondo bidean, gure udalek laster sarrera berri hori izango dutela jakitea”.
Hiru alkateek baietsi dute gaiak “berebiziko garrantzia” duela badiako herrientzat, eta, horregatik, jarraipen arduratsu eta gertukoa egingo diotela prozesu osoari, “konpromisoak bete daitezen eta 2027ko urtarrilean zerga berezia indarrean egon dadin”.
Horrez gain, hiru udalek gogorarazi dute BICE zerga indarrean jartzea Gipuzkoan egiteko zegoen lana zela (Araban eta Bizkaian urteak daramatza araututa), eta “ez dela nahikoa” badiaren egoera bereziari erantzuteko: “Aldaketa hau hiru herriok portuaren eraginez pairatzen dugun desberdinkeria txikitzeko bidea egiten hasteko aukera moduan ulertzen dugu; baina, aldi berean, portuko jardueren ondorioak arin daitezen lanean jarraituko dugu, Pasaialdearen biziberritze integrala sustatzeko finantziazio mekanismo sendo eta egonkor gehiago abiarazi beharko baitira etorkizunean, administrazio guztien arteko elkarlan eta inplikazioarekin. Horren alde lanean jarraituko dugu”.
