Martxoaren 8rako egitaraua, saretik josia
Gaur aurkeztu dute Martxoaren 8aren harira antolatu duten egitarau askotarikoa eta zabala.
Emakumeen Etxean aurkeztu dute Martxoaren 8ko egitaraua. Saretuta daude. Eta sare horretatik ondu dute Martxoaren 8aren bueltako askotariko egitaraua. Gaur aurkeztu dute Itsaso Cruz Berdintasun zinegotziak, auzo elkarteetako emakumeen taldeetako ordezkariek, eta talde feministetako hainbat kidek. Egitaraua, zabala eta aberatsa aurten ere.
Mendi Urruzuno argazkilariaren Hamaika emakume, hamaika erronka erakusketa zabalduko dute bihar Xenpelar etxean. Irekiera ekitaldia, 19:00etan izango da bihar eta hilaren 21era arte izango da zabalik. Urruzunok berak azaldu du gaur Emakumeen etxean egin duten agerraldian, enkargua jaso zuela Intxaurrondoko Kultur Etxetik kontatu du erakusketa hori egiteko. Argazkiak Urruzunorenak dira eta testuak berriz, Naiara Rodriguezenak, eta emakumea eta kirolaz mintzo da bertan, “erronkak, emakumeak, kirola, errefrente berriak, nola egiten dugun kirola, zer den guretzako kirola eta zer ez den, medailak diren edo ez, edo kirolarekin beste zerbait egiten eta bilatzen dugun…”.
Horretaz guztiaz hausnartzeko bide emango du Urruzunoren erakusketak. Pozika zaldu da, sortu eta urtebetera sorterrian erakutsiko duelako, “biltegi batean egon ordez, Xenpelar Etxean izango da eta oso pozgarria da hori niretzako”.
Ostiralean beste hitzordu bat, oso garrantzitsua. 330 emakume bilduko dira mahaiaren bueltan urtero antolatzen duten bazkarian. argi esan du Cruzek oso arrakastatsua dela bazkaria, “aforoak mugatzen duelako, bestela auskalo zenbat bilduko ginatekeen”. 14:00etan hasiko da bazkaria. Ospakizunekin eta aldarrikapenarekin jarraituta, larunbatean, martxoak 7, Mariasun landa Sarien banaketa egingo dute 12:00etan Emakumeen Etxean. Hamaseigarren ekitaldia du aurtengoa sariak eta Silvia Vesga Silva eta Ana Cristina Henriquez Torresi buruzko lanak izango dira sarituak. Pepi Asenjo Arrietak aipamen berezia jasoko du.
Manifestazioa berriz, igandean, Martxoaren 8an antolatu du Oreretako Mugimendu Feministak. Herriko Plazatik abiatuko da 12:30ean. Bukatzeko, Emakumeen Etxearen hileroko programazioaren barruan Maria Cruickshanken Life es simpol bakarrizketara gerturatzeko gonbita egin du Cruzek, “bakarrizketa euskaraz izango da eta emanaldiak eguneroko egoera errealei heltzen die umorez eta zintzotasunez, emakumeen trataera, sare sozialen eragina, eta gizarte patriarkalaren presioak mahai gainean jarriz”.
Aurreko horiek antolatutako batzuk baino ez dira, egitarau osoa ikusteko, egin klik hemen.
