Iparraldeko Orkestraren kontzertua, hirugarren urtez jarraian
Martxoaren 26an izango da kontzertua Lekuonan, 19:00etan; bezperan entsegu orokorra egingo dute Lekuonan, ikasleak eta adinekoak joango dira.
Errenteria-Oreretak kulturarekiko konpromiso sendoa izaten jarraitzen du. Herri Arteko Eskola eta Baionako Kontserbatorioak lankidetza hitzarmena sinatu zuten, eta hori dela eta, Iparraldeko Orkestrak hirugarren urtez jarraian, kontzertu bat eskainiko du Lekuonan. Hilaren 26an izango da, 19:00etatik aurrera. Aizpea Otaegi alkateak Iparraldeko Orkestrak herriarekiko duen konpromisoa nabarmendu du: “Ez da batere ohikoa orkestrak hiriburuetatik kanpo ikustea”. Iparraldeko Orkestraz gain, Euskadiko Orkestra Musikasten ere hitzordu finkatua du.
Edgar Nicoleau, Baionako Kontserbatorioko eta Iparraldeko Orkestrako zuzendari nagusia, Lekuonan egin duten aurkezpenean izan da. 50 urteko ibilbidea du Iparraldeko Orkestrak, eta hasieratik musika arlo guztietara zabaltzea izan du helburu. “Oso pozik nago hemen izateagatik eta udalak egindako ahaleginagatik”. Euskal Herria harreman estua duen lurraldea dela dio, eta Hego eta Ipar Euskal Herriko elkarlana sustatzea ezinbestekoa da.
Musikaren sektorean herria “erdigunean” dagoela gehitu du alkateak, eta harro egoteko modukoa dela. Orkestra herritarrei hurbildu nahi izan diete, eta 22 urtetik beherakoek doako sarrera izango dute, baita Herri Arte Eskolako ikasleek. Bestalde, sarreren prezioa 28 eurokoa izango da; aurresalmentan, aldiz, 24,99 eurokoa.
Obra garaikide batek irekiko du kontzertua, Richar Wagner-en Siegfried Idyll, eta horren ondoren obra klasikoak interpretatuko ditu Iparraldeko Orkestrak. Johan Svendsen-en Norvegiar Rhapsodia, E. Grieg-en obra eta Benjamin Attahir-en Stream insertion. “Kontzertu honen altxorra, piano eta orkestrarako kontzertua egongo dela”, adierazi du Beñat Rallak, Herri Arte Eskolako koordinatzaile pedagogikoa. Judith Jauregi piano jotzaile donostiarrak orkestrarekin batera parte hartuko du. “Luxu bat da, formatu esanguratsua da piano bakarlari eta orkestra bat ikustea”, gehitu du.
Kontzertuaz gain, egun handiaren bezperan entsegu orokorra egingo dute Lekuonan, bertan. Herriko hainbat ikastetxeetako Bigarren Hezkuntzako 250 ikasle inguru entsegu orokorra bertatik jarraituko dute. Ikasleekin batera, adinekoak ere izango dira. Rallak aipatu du adinekoen zentroetako pertsonak ere hurbiltzeko ahalegina egingo dutela.
Apirilerako bigarren hitzordua aurreikusi dute, eta kasu honetan, Niessen Kulturguneko auditorioan izango da. Iparraldeko Orkestrako haize-ganbera taldeak Prokofiev-en Peio eta otsoa eskainiko du, formatu txikiagoan. “Kontzertu narratzailea iznago du Mixel Etxekopar-en testuekin, eta hizkuntza bitartekaritza ahalbidetzeko orkestrako musikariek masterclass eskainiko diete gure ikasleei”, gaineratu du Beñat Rallak.
