Tontorrak konkistatuko dituzte Emakumeen Egunean
Trintxerpeko Itsastarrak Mendi Taldeak eta Herrerako Mendizaleek Otzaurteko portuko ibilbidea egingo dute igandean. Irteeraren ondoren jatetxe batean bazkaltzeko aukera egongo da.
Trintxerpeko Itsastarrak Mendi Taldea eta Herrerako Mendizaleak Zegama ingurura joango dira igandean (hilaren 8an), Otzaurteko portuko ibilbidea egiteko. Mendizaleak 07:00etan irtengo dira Trintxerpeko kaitik, eta 07:05ean Garberan, 07:10ean Pio XIIn eta 07:15ean Andoainen geldialdiak egingo dituzte, jendea jasotzeko. Bazkideek 20 euro ordaindu beharko dituzte parte hartzeko; bazkide ez direnen prezioa, aldiz, 22 eurokoa izango da. Izen emateak galdetegi bidez egin behar dira.
Mendizaleek bi ibilbide proposatu dituzte: luzea, 18,7 kilometrokoa eta motza, 12,4koa. Bi ibilbideak Otzaurteko portutik abiatuko dira eta Zegaman bukatuko dira irteerak. Ibilbide luzeak 6 ordu inguruko iraupena izatea aurreikusi dute mendizaleek. Horiek bi gain konkistatzeko aukera izango dute: Añabaso (964 metro) eta Oazurtza (845 metro). Hala ere, ibilbide luzea tontorretara iritsi gabe egin daiteke. Bestalde, ibilbide laburrak lau ordu eta erdiko iraupena izango du. Horiek ere Añabasoko gainera iristeko aukera izango dute.
Mendizaleek jakinarazi dute irteeraren ondoren jatetxe batean bazkaltzeko aukera egongo dela. Han bazkaldu nahi dutenek galdetegian zehaztu behar dute asmo hori. Menuak 30 euroko kostua du, eta jatetxean bertan ordainduko da, ez aldez aurretik. Menuak honakoak biltzen ditu: babarrunak edo entsalada, baserriko oilaskoa edo bakailaoa saltsan eta postrea. Ura, ardoa eta kafea barne.
