"Borroka feminista bizitzaren, duintasunaren eta justizia sozialaren aldeko borroka da"
Saregileak taldeak premiazko deia egin die pasaitarrei Martxoaren 8an kaleak hartzeko. Horrez gain, erakundeei "baliabide errealak, publikoak, integralak eta kalitatezkoak" exijitu dizkie.
Itsasoren, portuaren eta Luzuriaga bezalako fabriken aurrean Pasaia zutik mantendu zuten emakumeen oinordeko gisa, Saregileak taldeko emakumeek ahotsa altxa dute Martxoaren 8ari begira. Oraindik ere emakumeak “zaurgarrienetakoak” izaten jarraitzen dutela salatu dute, “zaintza lanen zama ikusezina eta isiltasunean hiltzen gaituen indarkeria matxista pairatzen ditugu”.
“Bakarkako erresistentzia” nahiko ez dela aldarrikatu du Saregileak mugimenduak; hori dela eta, ez dute “agintarien hitz hutsik nahi, ezta itxurakeriarik ere”. Horren aurrean, erakundeei “baliabide errealak, publikoak, integralak eta kalitatezkoak” exijitu dizkiete, “benetan babestu eta lagun gaitzaten”.
Martxoaren 8a den bezalakoa aldarrikatuko dute Saregileak taldekoek: “Langile borroka eta borroka feminista”. Emakumeen eskubideak, gainera, “paper errea” izan ez daitezela eskatu dute. Horregatik, “premiazko” deia egin diete pasaitar guztiei, honakoak aldarrikatzeko:
- Egun honetarako deitutako mobilizazioekin bat egitera.
- Kaleak hartzera, gure pilatutako amorruaz eta gure itxaropenaz.
- Gure eskuak hartzera, zaurgarritasunaren aurrean gure armarik onena antolakuntza eta sororitatea direla erakusteko.
Saregileak lehen egon zirenengatik, orain daudenengatik eta etorriko direnengatik aterako dira kalera, “borroka feminista bizitzaren, duintasunaren eta justizia sozialaren aldeko borroka delako”.
