Egoera txarrean zeuden zuhaitzak kendu, eta berriak jarri
Egoera eskasean zeudenak ordezkatzeaz gain, eremu berrietan ere landatu ditu zuhaitzak Lezoko Udalak.
Lezo Bertsolaria kale ondoko landaketaren irudia.Ikerne Zarate Jaizkibel hiribidean, Lopene plazan, Karlos Saldise plazan eta Larrun kalean egoera txarrean zeuden zuhaitzak kendu, eta berriak jarri ditu Lezoko Udalak. “Osasuntsu ez dauden zuhaitzak kendu eta berriengatik ordezkatzea ohiko jarduketa da, eta nagusiki herritarren segurtasuna bermatzeko helburuarekin egiten da”, zehaztu du udalak. Kendutako zuhaitzak ordezkatzeko espeziea aukeratzeko garaian, landatuko den lekua hartu da kontuan, “izan ere, helburua landatutako zuhaitzak mantenu behar gutxi izatea eta modu naturalean garatu ahal izatea da. Horrez gain, herriko biodibertsitatean ekarpena egitea eta paisaia aberastea ere lehentasun izaten dira”. Beraz, kendutakoen ordez ezkiak, astigarrak, gereziondoak eta ginkgoak landatzen ari dira.
Kaltetuak zeudenak aldatzearekin batera, beste hainbat eremutan landaketa berriak egiten ari da udala. Hala, Lexo Bertsolaria kalean gereziondoak jartzen ari da, eta kale bereko parkean baso-landareak ere landatu ditu, besteak beste haritzak, elorriak, gurbitzak, gereziondoak, hurritzak, basaerramua eta sagarminak.
“Ekintza hauekin Lezoko Udalak ingurumenaren kalitatea hobetu eta etorkizuneko belaunaldientzat herriko berdeguneak indartzen ditu. Ingurunea errespetatu eta landaredia zaintzearekin batera, Lezo zaintzeko konpromisoa du”, adierazi du udalak.
