Pasaiako EH Bildu: "Portuak ez die herritarren erabakiei errespeturik erakusten"
Pasaiako EH Bilduko kideek irmo salatu dute PPAk aparkalekuaren ordenantza epaitegietan inpugnatu izana, "hori onartezina da, guztiz".
Pasaiako EH Bilduko kideak, atzo, San Pedroko portu eremuko aparkalekuan egin zuten agerraldian. Pasaiako Portu Agintaritzak (PPA), Pasaiako Udalaren Aparkalekuaren Ordenantza inpugnatu egin du auzitegietan. Ordenantza horretan, PPArenak diren eremuetan hainbat aparkaleku ditu sartuta udalak. “Nahiz eta prozesuaren hasieratik PPArekin elkarrizketa etengabea izan zen, nahiz eta portuak aurkeztutako zenbait alegazio ere onartu, auzitegietara eraman zuen araudia, eta orain auto judizial batek mugatu egiten du udalak aparkalekua arautzeko duen gaitasuna hainbat eremutan”, salatu du Pasaiako EH Bilduk. Eremu horiek Donibanen, San Pedron eta Trintxerpen daude. “Pasaiako EH Bildutik gure gaitzespen irmoa adierazi nahi dugu PPAren jardunaren aurrean, berriz ere argi utzi du ez dituela Pasaiako herritarren behar sozialak aitortzen, ez herritarren erabakiei errespeturik erakusten ere”.
Agerraldia egin zuten atzo arratsaldean, San Pedron, EH Bilduko militanteek eta hainbat kargu publikok. Aparkaleku araudi berriarekin, udal gobernuan den koalizioak “eskaera historiko” bati erantzuna eman ziola azaldu zuten, “aurreko gobernuek luzaroan zokoratu zutena”. Aparkalekuen ordenantza horren oinarrian dago pasaitarrek euren ibilgailuek aparkatzeko aukerak errazteaz gainera, “barrutietako bizimodua hobetzea, oinezkoen espazioak berreskuratzea, eta gure herrian duintasunez bizitzeko aukerak erraztea”, EH Bilduren arabera: “Baina PPAk logika ekonomikoaren barruan k0katu ditu berriro bere eremuak, eta ez herritarren bizitzan ezinbesteko diren espazio sozial gisa”.
Koalizioko kide pasaitarren ustez, Pasaiaren barruan portuak ezin du “salbuespen” izaten jarraitu, “udalerrian integratu behar du, hesiak ireki behar ditu, espazioak erabilera publikora itzuli behar ditu, eta herritarren nahiz horien ordezkari den udalaren subiranotasuna errespetatu behar du orainaz eta etorkizunaz erabakitzeko. Ez dugu onartzen gure bizitza etengabe judizializatzen duen botere arrotz batek jauntxokeria. 16.000 pasaitarrei bizitzei eragiten dieten erabakiak ezin dira udalerritik kanpo inposatutako logika baten menpe geratu”.
Espainiako Gobernuaren jabetzakoa da Pasaiako Portua. Presidentea, ordea, Eusko Jaurlaritzak izendatzen du. Horren harira, interpelazio zuzena egin die Pasaiako EH Bilduk Jaurlaritzan agintean diren EAJri eta PSE-EEri. “Alderdi horiek Pasaian dituzte ordezkariei eskatzen diegu gai larri honetan esku-har dezatela, gure herrian nola bizi nahi dugun erabakitzen uzteko”. Aldi berean, alderdi horiei galdegin diete udalerriaren eta PPAren artean zabalik diren gatazka judizialak eteteko ahalegina egin dezatela, “gai horiek udalerri mailako debate politikora ekartzeko. Errespetatu Pasaiako herritarren hitza eta erabakia”.
