"Feminismotik beste mundu bat posible da"
Inperialismoa, egungoz aintza eredua, faxismoa eta gerra jo mugan jarri ditu mugimendu feministak, aliantzak sortzera eta konspiratzera deituta.
Ehunka lagunek egin dute bat Martxoaren 8ko manifestazioarekin. Mundu bat bildu da Oreretako mugimendu Feministak gaur eguerdian antolatutako manifestaziora. Parte hartzaile baten kontaketaren arabera, 1.700 lagun izan dira mobilizazio handi horretan. Batukadaren doinuarekin abiatu da manifestazioa Herriko Plazatik 12:30ean Beste mundu bat feminismotik: antolakuntza eta borroka leloa zuen pankartaren atzean. Oso presente, ezin bestela, herriko erresidentzietako langileak; borrokan ari dira hitzarmena berritu eta lan baldintza duinak lortzeko Jesusen Bihotzan eta San Markosenen. Langileak izan dira protestan gaur, baita egoitzetako senideak ere zaintza duinaren aldarria egiten.
Bidean batu zaizkio mugimendu feministaren protestari Duintasuna pentsiodunen aldarria. Anbulatorio kanpoan ziren manifestazioa heldu zain eta elkarri txaloka hartu diote elkarri bi eragileek. Manifestazioa luzea, oso luzea; buru Biteri kalean zenean, Iztietako anbulatorioaren parean zen bukaera.
Zumardira helduta, txalapartaren ttakunak eta Jare Antzizarren bertsoak hartu dituzte protestara bildutakoak. Horren ostean, Oreretako Mugimendu Feministak egin du irakurketa. Lehenik eta behin Tatiana izan dute gogoan, indarkeria matxistak Euskal Herrian aurten hil duen lehen emakumea. Eraso berean larri zauritu zuten emakumea ere gogoan, “ahalik eta azkarren osatzeko indarra bidaltzen diogu hemendik”. Mezu argia, “ez zaituztegu bakarrik utziko. herri hau ez da ahanzturan eroriko”.
Inperialismoa, faxismoa eta eskuin muturraren gorakada hizpide feministek; gogor salatu dute: “Nazka ematen diguzue”. Inperialismoari berriz, herriak eta gorputzak askatzeko aitzakiapean arau mendebaldar, bitar eta baztertzaile baten menpean jarri nahi izatea egotzi diote: “Aurrerapena eta garapena saltzen ditu inperialismoak, herrien burujabetza urratuta. Hala ikusi dugu Afganistanen, Iraken, Libian, Palestinan, Kongon, Iranen eta beste hainbeste lurraldeetan. Gaza eta mundua sutan diraute, gure kide kurdoak, Rojavan, gerrari egiten diote aurre, Sahararen abandonoa, disimulurik gabeko esku hartzea Venezuelan…”.
Aergi esan dute aberatsek probrren kontra egindako gerra globala dela, “eta feministok ongi baino hobeto dakigu horrek esan nahi duena: suntsipena, heriotza, sexu bortxakeria. Ez, gure izenean!”.
Gaurkoa aldarrikapenerako eta borrokarako eguna dela esan dute, bestalde, baina ondotik hutsegiterik ez dagoen borrokarako beste data batzuk heldu direla, martxoaren 17ko greba orokorra, hilaren 21eko arrazakeriaren kontrako eguna, hilaren 30ean zaintza eta etxeko langileen eguna, eta hilaren 31 trans ikusgarritasunaren eguna. Borroka horiek guztiak ikusarazi ditu gaur mugimendu feministak baina denen gainetik bat nabarmen jarri nahi izan du: Erresidentzietako langileen borroka, “denbora luze daramate egoera penagarriak pairatzen egunero egunero”. Txalo zaparradarekin erantzun dute bildutakoek, “gure adinekoen zaintzarekin negozioa egin nahi duen administrazioak lotsarazi egiten gaitu, zaintza negozioa den bitartean ez dugu duintasunik izango”.
Puntu horretan gainera zuzenean egotzi dio ardura Gipuzkoako Foru aldundiari “zaintzarekin betetzen duzue ahoa, baino ez zarete koherenteak zuen ekintzetan. Zaintzarekin jolasean ibiltzea, mespretxagarria da”. Horretan ere mezu argia mugimendu feministak, “·ez dugu onartuko zaintzarekin negozioa egitea”.
Sinistuta daude, eta badakite bidea, “feminismotik beste mundu bat posible da”. hori horrela, aliantzak sortu eta konspiratzera deitu dute “egunean 24 orduz lanean inguruan ditugun emakumeekin, atarian, familian, kalean, antolakuntza eta borroka ez da beste biderik”.
