Antzerkiak Pasaia hartuko du
Hilaren 12tik 15era Pasaia KM0 jaialdiaren laugarren ekitaldia egingo da Antxon eta Donibanen. Aurtengoak bost emanaldi izango ditu.
Antzerkiak Pasaia hartuko du hilaren 12tik 15era bitartean (ostegunetik igandera), Pasaia KM0 jaialdiaren laugarren ekitaldia egingo baita. Arte eszeniko herrikoiaren jardunaldiak bost emanaldi izango ditu, eta Antxon eta Donibanen izango dira. Aurtengoa, gainera, berritasunekin lurreratuko dela adierazi du Iñigo Ortega zikloaren antolatzaileak eta Pasaia Badia antzerki eskolako arduradunak: “Aurten berritasun batzuekin dator jaialdia eta inoiz baino komikoago, lan guztiak komediak baitira. Berritasunen artean, jaialdiaren luzapena da bat, jaialdia hiru egunetik laura pasa delako”.
Bestalde, honakoa baietsi du Laura Ré Kulturako eta Ondareko zinegotziak: “Gobernutik antzerki amateurraren aldeko apustua egiten jarraituko dugu. Jaialdia erreferente bat bilakatzen ari da eta, iraupena luzatzeaz gain, plaza berri bat gehitu diogu. Aurreko edizioetan emanaldi guztiak Donibanen izan ziren eta aurten horietako bat Antxon antolatzea erabaki dugu, zehazki, KM0ri ongi etorria Antxoko Kultur Etxean emango diogu”.
Jaialdia egun bat luzatu eta plaza bat gehiago emateaz gain, aurten genero familiarrari begira jarri dira sustatzaileak, eta antzerki zirku lan bat ikusteko aukera izango da hilaren 14an, Donibaneko Juanba Berasategi aretoan.
Pasaia KM0ren antzezlan guztiak doakoak dira, baina sarrerak aldez aurretik erreserbatu behar dira Bibe atarian, edukiera kontrolatzeko.
Antzerki Uztaren IV. ekitaldia, Pasaian
Oarsoaldeko antzerki eskolek elkar ezagutzeko asmoarekin, Antzerki Uzta egitasmoaren IV. urtea izango da aurtengoa. Iniziatiba Lezon, Oiartzunen eta Errenteria-Oreretan egin ondoren, Pasaiak antolatuko du aurten.
Topaketa hori Pasaia KM0 jaialdian txertatzea aukera “ezin hobea” dela ikusi dute antolatzaileek. Bide horretan, hilaren 14an eskualdeko lau herrietako 10 eta 11 urte arteko antzerki eskoletako ikasleak Donibanen elkartuko dira, elkar ezagutzeko. Bertan, dinamikak egingo dituzte eta zirku antzerki tailer bat jasoko dute Zirika Zirkus konpainiako kideen bidez. Eguna elkarrekin pasa ondoren, zirku emanaldia ikusteko aukera izango dute.
“Pasaia KM0 egiten dugun laugarren urte honetan antolatzaileok pozik eta harro esan dezakegu urtero antzokiak bete izan ditugula, eta bertan egiten den sorkuntzarekin gozatzeko izugarrizko aukera dela. Pasaitarrak eta inguruko herriko jende asko data honen zain daudela badakigu”, adierazi du Ortegak.
Pasaia KM0
Hilak 12, osteguna
- 19:00: Fumas eta Fikziohesioa komedia motzak. Antxoko Kultur Etxean.
Hilak 13, ostirala
- 19:00: Nueve teatro taldearen Un enredo casi familiar. Donibaneko Juanba Berasategi aretoan.
Hilak 14, larunbata
- 18:00: Zirika Zirkusen Marietak Zirkus ikuskizuna. Juanba Berasategin.
Hilak 15, igandea
- 19:00: Trebera taldearen No hay ladrón que por bien no venga. Juanba Berasategin.
