Antxoko Musika Astea, ate joka
Pasaiako Musika Bandak antolatuta, aurtengo zikloa hilaren 15etik 22ra izango da, eta hiru emanaldi jasoko ditu.
Pasaiako Musika Bandak, Pasaiako Udalak eta Pasaia Musikal Fundazioak Antxoko Musika Astea antolatu dute. Aurtengo zikloa hilaren 15etik 22ra bitartean izango da, eta hiru emanaldi jasoko ditu. Jose Maria Hernandez bandako presidenteak adierazi du Antxoko Musika Asteak 30 urte egin eta bere elkarteak mendeurrena bete ondoren, ziklo musikala “lehen eguneko ilusio berarekin” antolatu dutela.
Hiru hamarkadaz Musika Astea egitea barrutiarentzat albiste ona dela baietsi du Mikel Garcia Peñil Antxoko alkateordeak: “Zalantzarik gabe, horrenbeste urte kultura egutegian musika emanaldi sorta hau mantentzea albiste ona da Antxoko barrutiarentzat, eta baita Pasaiarentzat ere. Horrelako egitasmoek barrutiari bizia ematen diote, eta musika eta kultura herritarrengana gerturatzeko aukera paregabea dira”.
Garciaren ildo beretik, honakoa nabarmendu du Laura Ré Kultura zinegotziak: “Musika Astea bezalako egitasmoek argi erakusten dute Pasaian badagoela kultura bizia eta askotarikoa. Horregatik, udaletik lanean jarraituko dugu kultur jarduerak sustatzen eta herritar guztien eskura jartzen”.
Egitaraua
Antxoko Musika Astea hilaren 15ean (igandearekin) hasiko da, Leioa Kantika Koroaren emanaldiarekin. Kontzertua San Fermin elizan izango da, 18:30ean. Abesbatza 2000. urtean sortu zen, Leioako Udal Kontserbatorioan, eta, egun, 10 eta 18 urte arteko gazteek osatzen dute taldea.
Zikloak datorren asteburuan izango du jarraipena. Hilaren 21ean Irungo Nayade abesbatzak kontzertua eskainiko du San Fermin elizan, 20:00etan. 1997an sortua, 30 abeslari inguruk osatze dute taldea.
Musika ardatz duen zikloa hilaren 22an itxiko da, Trintxerpeko Ilunbe Musika Bandaren emanaldiarekin. Kontzertua Biteri plazan izango da, 13:00etan. Euria egingo balu, Ibaiondo frontoira lekualdatuko lukete saioa.
Jose Maria Hernandezek eskerrak eman dizkio Pasaiako udal gobernuari kultur jardueretan udala eta Pasaia Musikal bidelagun eta babesle izateagatik. Horrez gain, eskerrak eman dizkio San Fermin elizari, eta pasaitarrak Musika Astearen kontzertu eta jarduerez gozatzera gonbidatu ditu.
Antxoko Musika Astea
Hilak 15, igandea
- Leioa Kantika Koroa.
- Ordua: 18:30ean.
- Tokia: San Fermin elizan.
Hilak 21, larunbata
- Nayade abesbatza.
- Ordua: 20:00etan.
- Tokia: San Fermin eliza.
Hilak 22, igandea
- Trintxerpeko Ilunbe Musika Banda.
- Ordua: 13:00etan.
- Tokia: Biteri plazan. Eguraldi txarrarekin Ibaiondo frontoian.
