Eguzki: "Noiz hasiko dira saneamenduko lanak?"
Hilaren 3an Donibaneko saneamenduaren proiektuaren egoera jendaurrera eraman zuen udalak. Eguzkik adierazi du "eskertzekoa" dela herritarrei gaien berri ematea, baina talde ekologistak argi du bizilagunek "ziurtasunak" behar dituztela.
Donibaneko saneamendu proiektuaren berri emateko eta herritarren iritziak jasotzeko, Pasaiako Udalak informazio bilera ireki bat egin zuen hilaren 3an. Eguzki Talde Ekologistaren arabera, proiektu berria “oso aurreratua” dago eta bukatu ondoren udalak jendaurrean jarriko du. Fase hori gauzatuta, hitzarmen bat sinatuko da lanak finantzatzeko. Azkenik, obrak lizitatzeko eta esleitzeko prozedura irekiko da.
Faseetako epeak oso zehatzak izan ez zirela adierazi du Eguzkik, eta lanen hasiera urte bukaerarako kokatu zutela gaineratu du talde ekologistak. Xehatutako prozedura hori ere aurrez errepikatu izan dela jakinarazi du Eguzkik: “Proiektua idaztea edo finantzaketarako hitzarmena egitea. Baina errealitate gordina da ingurumenerako, sentikortzat jotako eremu bateko uraren kalitaterako eta pertsonen osasunerako ezinbesteko azpiegitura bat oraindik ere eta bete gabeko promesa askoren ondoren, oraindik ez dela hasi ere egin”.
Eguzki bat dator bilera irekian bizilagunek erakutsitako “asperraldiarekin” eta “mesfidantzarekin”, gaiari buruz dagoen “kronologia zabalak berretsi egiten baititu sentimendu horiek”. “Adierazi zen bezala, aurreko aldietan lanak hasteko urrats guztiak agortu ziren, obrak hasteko datak agindu ziren, baina, egia esan, 2007an Esther Larrañaga sailburuak saneamendurako lanak martxan zeudela eta lehentasuna zutela iragarri zuenetik, eta Pasaiako Udaleko EAJk eta PSEk Eusko Jaurlaritzak obrak 2018an hasteko data eman ziela adierazi zutenetik, gaur egun ez dago saneamenduari buruzko obra arrastorik”, baietsi du Eguzkik.
Talde ekologistak adierazi du “eskertzekoa” dela herritarrei zuzenean eragiten dieten gaien berri ematea, baina gai honetan, “hainbeste denbora galdu ondoren, herritarrek ziurtasunak behar dituzte”. “Obrak behingoz hasiko direla bermatu behar zaie, eta hori ez zen gertatu. Hori dela eta, beste ez betetze berri baten zalantza giroa sortu zen. Eta zoritxarrez hala bada, erantzukizunak eskatuko al dira behingoz?”, hausnartu du Eguzkik.
