Harro eutsiko diote lekukoari, eta euskarari
22 kilometroan zehar, 32 eragilek eramango dute 24. Korrikaren lekukoa Errenteria-Oreretan barrena.
22 kilometroan zehar, 32 eragilek eramango dute 24. Korrikaren lekukoa Euskara Gara eguna ospatzen ari dira gaur Errenteria-Oreretan, gogotik ari direla ezin ezkuta. Karpa jarri du Korrika Batzordeak Zumardian eta euskararen epizentro bilakatu du mahaiaren bueltara bildu diren 100 lagunen eskutik. Bazkaldu bapo egin dute, eta bukatzen ari zirela argitu dute misterioa: nork eta non eramango duen lekukoa herrian barrena. Maldan gora edota lautik eramatea tokatuko ote zaien, Erdialdean edota auzoren batean, partekatuta edota bakarrik… horrek guztiak berdin diola argi utzi dute. Maldan gora ere, erraz eramango dute lekukoa; lekukoa eta euskara, biak ala biak, harrotasunez.
Naroa Iturri kazetariak izendatu ditu kilometroz kilometro, bakoitzean lekukoa eramateko ardura izango duten eragileak. Adi jarraitu dituzte haren hitzak lekuko hartzaileek, eta txaloka erantzun bakoitzean mahaiaren bueltara bildutakoek. Albiste azpiko koadroan daude zehaztuta kilometro zenbakia, ordua eta zein eragilek eramango duen.
22 kilometroan zehar, 32 lekuko aldaketa egingo dituzte beste hainbeste eragilek. Izan ere denek eraman nahi dute lekukoa, denek nahi dute Korrikaren parte izan, magikoa delako une hori.
Banan bana igo dira oholtzara deitu ahala—bateren batek huts egin badu ere— eta igo bezala jaso dute petoa zegokien kilometro zenbakiarekin eta lekukoa. Eskuz esku pasa dute hori, euskararen sarea sendoa dela agerian jarrita. Gainera, eragile bakoitzak opari bat eraman behar izan du; horiek ondoren egin duten bingo musikatuan zozkatu dituzte, eta ondoren, DJ jotatxok jarriko ditu dantzan guztiak.
Lekuko eramaile gehien-gehienek hartu dute hitza, emoziotik ia denek. “Ohorea” dela lekukoa eramatea esan du Don Bosco LHIko ordezkariak. Aldapan gora egin beharko duelako sustoa hartu duela aitortu du Aizpea Otaegi alkateak, berehala eman dio buelta baina, “euskararen alde aldapan gora egiten ohituta gaude, eta egingo dugu”.
Zinez hunkituta Orereta Ikastolako ordezkaria, “atzo jakin nuen lekukoa eramango dudala eta lorik egin gabe eman dut gaua”. Oreretako Mugimendu Feministaren mezua ere gaurko lekuko eramaileen jakinarazpenean, “gora Korrika, gora euskara eta gora Korrika transfeminista”. Xenpelar AEKko ikasleak, Lau Haizetara euskaltzaleon topaguneak, Bertso eskolak, Badalab eta Sos Arrazakeriak partekatutako kilometroaren izenean mintzatu denak, “ohore bat” dela Korrikaren lekukoa eramatea esan du,” jarrai dezagun euskaratik euskararentzat herria eraikitzen”. Gazteek, berriz, euskara izateko konpromisoa berretsi dute. Horiek batzuk baino ez; denak hunkituta, pozik.
Lekuko aldaketak
1639 Don Bosco LHI. Kaputxinoetako biribilgune sarreran, 08:44an
1640 Udala, Sorgintxulo 5. zenbakian, 08:46an.
1641 Podemos. Sorgintxulo 15, 08:47an.
1642 EH BilduSorgintxulo kalea Gamonen atzeko zebrabidea, 08:48an.
1643 Kirol Aisi eta Urdaburu Mendizale elkartea. Sorgintxulo 6, 08:50ean.
1644 Errenkoalde eta Bixigarri. Galtzaraborda hiribidea, 103, 08:51ean.
1645 Orereta Ikastola. Esnabide kalea, 08:52an.
1646 Oreretako ikastetxe eta DBH eta Batxilergoko ikasleak. Galtzaraborda hiribidea 67, Beraungo osasun zentro ondoan, 08:54an.
1647 Lapurdiko pizzak. Galtzaraborda hiribidea 5, 08:56an.
1648 Herri Arte Eskola eta EMKE Musika Banda. Galgtzaraborda hiribidea 55, 08:57an.
1649 Udal Hiri Mantenua eta Duintasuna Pentsiodunen elkartea. Galtzaraborda hiribidea 37, 08:59an.
1650 Laboral Kutxa. Urbia plazan, 09:00etan.
1651 Oaingozhau eta Udala (Euskaraz barra barra). Aralar plazan, 09:02an.
1652 Etxerat, Elkarte Gastronomikoak eta Auzo Elkarteak. Maria Lezo kalea 13, 09:03an.
1653 Oreretako Mugimendu Feminista. Alhondiga baino lehenagoko bidegurutzean, 09:04an.
1654 Koldo Mitxelena ikas komunitatea. Zumardiko zebrabidea, 09:06an.
1655 Xenpelar AEKko ikasleak, Lau Hizetara, bertso Eskola, Badalab, eta SOS Arrazakeria. Galizia biribilgunean, 09:07an.
1656 Ernai, Ikama eta Gazte Asanblada. Nafarroa etorbidea 73, 09:10ean.
1657 Ereintza eskubaloi taldea eta Hibaika arraun elkartea.. Nafarroa etorbidea 81, gasolindegia, 09:10ean.
1658 Aterpe. Oreretako sarrera biribilgunea, 09:11n.
1659 Biteri Taberna, Gi-636rako sarbidea, 09:13an.
1960 Ereintza Dantza Taldea. Kapiutxinoetako biribilgunea, 09:15ean.
