Langileen eskubideen eta bizitza duinen alde indarrak batzera deitu dute
Agerraldia egin du greba batzordeak martxoaren 17aren barruan antolatutakoen berri eman eta herritarrak protestara batzera deitzeko.
Oreretako greba batzordeak agerraldia egin zuen atzo. 1.500 euroko Lanbidearteko Gutxieneko Soldata eta bertan erabakitzea. Horiek dira martxoaren 17ko grebaren zio nagusiak. Horien atzean berriz, prekarietatea, aberastasunaren banaketa justua, gizon eta emakumeen arteko soldata arrakala, eta hamaika erpin gehiagori erantzun nahi diete deitzaileek.
ELA, LAB, Steilas, Etxalde eta Hiru sindikatuek deitu badute ere eragile ugari batu zaizkie.
Oreretako Greba Batzordeak agerraldia egin zuen atzo, herritar denak grebarekin bat egitera deitu eta datorren astearterako antolatu duten egitarauaren berri emateko. ELA eta LAB sindikatuak, Duintasuna Pentsiodunen Mugimendua, Ernai eta Jardun gazte antolakundeak, mugimendu feminista eta norbanakoak bildu ziren Herriko Plazara atzoko agerraldian parte hartzeko.
Langileek gero eta baldintza prekarioagoak jasaten ari direla esan zuten agerraldi horretan, ziurgabetasun eta krisi askoren testuinguruaren ondorioz, eta aberastasuna ere gero eta modu bidegabeagoan banatzen dela bien bitartean. Grebaren aldarrikapen nagusia azaldu zuten ondoren, “soldata propioa hemen erabaki ahal izatea, eta 1.500 eurokoa izatea”.
Greba tresna “garrantzitsutzat” jo zuten euren aldarrikapenak lortzeko, eta aldi berean, borroka molde hori, sistema patriarkal, kapitalista eta arrazistak sortzen dituen desberdintasunen aurkako borroka ere badela gaineratu zuten, “horregatik Oreretako greba batzordeak herritarrak martxoaren 17ko grebaren harira herrian antolatuko diren mobilizazioetan parte hartzera gonbidatu nahi ditu, langileen eskubideen alde eta bizitza duinen alde indarrak batzeko”.
Grebari erantzun handia ematea aurreikusi dute greba batzordeko kideek, hala adierazi zuen atzoko agerraldi horretan LAB sindikatuko Aritz Ezeizak, “datu ofizialen zain, enpresetan eta merkataritzan jasotako informazioaren arabera arrakastatsua izango dela aurreikusten dugu. Oarso Bidasoari begira adibidez, CAF eta Niessen enpresek bat egingo dute grebarekin”.
Beste datu bat era jaso du HITZAk; Lezo Institutuko irakasleen %94k grebarekin bat egin du.
Oarso Bidasoko langile plantilaren %100 egin du bat greba deialdiarekin. Hori horrela, eta informazio eskubidea nagusitzen dela ulertuta, martxoaren 17ko grebaren edukiak baino ez ditu landuko HITZAren lantaldeak egun horretan.
